一向反對23條立法的吳君如，前日抱恙在身仍堅持出席7.1大遊行。昨日君如透露有友人事前實牙實齒相約出席遊行，卻臨時一句「總之好大鑊」便甩底，令她十分生氣，聲言以後沒朋友做，似乎矛頭指向黃秋生。對曾鈺成指遊行人士是被誤導而上街一事，君如亦激動地還擊。
吳君如昨日穿上一襲黑色性感透視裙，往豪華天星小輪出席有線娛樂新聞台星級主播簽約儀式。一向旗幟鮮明反對23條立法的君如，前日遊行時雖抱恙在身，但仍堅持與男友陳可辛行畢全程。
昨日君如透露日前曾有好友致電相約她七月一日集合一齊遊行，最終該友人卻臨時甩底。君如炮轟道：「我對呢啲朋友好失望，之前好熱誠打電話嚟約我一齊去，我重同佢哋講三點天后等，點知最尾佢哋打電話同我講：『總之好大鑊，收到風。』結果就冇去到，我明白佢哋有自由，如果真係搵唔到理由去，我會尊重，但我唔會尊重一啲之前實牙實齒話會去但冇到嘅人，我會對佢好冷淡，鄙視佢哋，佢哋喺我心目中嘅形象降晒grade（級數）。」
君如續說：「artist（藝人）可能對政治冷感，驚講多錯多，電影公司施壓，唱片公司又叫唔好講咁多會穿崩俾人笑，但我唔明有幾大鑊。」記者追問她甩底的是否黃秋生時，君如呆了一會兒才說：「唔係，唔好迫我講係邊個。我曾經喺節目上講過，我愛香港，我係土生土長嘅香港妹，呢一班我識嘅朋友，我唔知點做朋友，可能佢哋都唔當我係朋友，道不同不相為謀，佢哋當我係儍婆，而佢哋就明哲保身。」
另一方面，對於民建聯主席曾鈺成前日指往遊行的市民是被人誤導，還稱無論幾多人遊行都不會影響其支持23條的投票意向，君如炮轟說：「就係因為一個社會上有貧富同每人智商都有高低，就要解釋到我哋每個人都明白同有信心，唔好一知半解，唔明就講到明，要令我哋心服口服至可以行使呢個立法權利。」
問君如會否響應李卓人召集，於下周三（九日）23條立法當日包圍立法會表達不滿？她說：「要再了解清楚啲，乜嘢團體舉行，同埋點解要圍立法會先可以決定。」
而張栢芝日前曾表示七月一日要到內地公幹，故不能參與遊行，鄭中基亦曾揚言遊行當日要拍戲，但前日二人卻被發現在大浪灣游水曬太陽。對於他們的行徑，君如說：「寄語佢哋下次講嘢小心啲，可能佢哋覺得游水緊要啲，曬一身古銅色肌膚緊要過行使自已嘅權利。」
此外，有指黃秋生正是君如口中的嫌疑人物，記者昨日致電秋生問他為何沒有參加遊行時，秋生說：「我噚晚（即前晚）要執嘢，因為第二日要去內地拍《功夫足球》，我要去成幾個月，唔可以簡單咁執三件衫就去。至於我今日（即昨日）重喺香港，係因為臨時又唔使去住，改咗聽日先去，總之啲期好亂。」
秋生竟表示從未堅稱一定會出席遊行，他說：「我都冇講過一定會去，我話得閒先去咋！咁我唔得閒咪唔去，係傳媒將『可能』變『一定』。」有傳秋生是遭電影公司老闆施壓所以沒去遊行，對此他說：「冇，我啲老闆好好，唔會有壓力。」
問到秋生下周三可會參加包圍立法會行動？他說：「到時我唔喺香港嘛，我覺得政府再咁堅持落去，唔止冥頑不靈，我重會送佢四個字『官迫民反』，政府自己唱衰香港六年，做賊又喊捉賊。」秋生愈說愈激動，他又說：「我覺得特首董建華要有羞恥心，不過政府冇反省自己嘅能力，好易會造成官迫民反。」
採訪：馮美茵、比華利
攝影：甄朝健
