假後復市，港股在窄幅內上落，恒指收市升25點，仍守穩在250日線（9546）之上。綜合芬佬意見，佢哋多數認為大市未來幾日仍會牛皮整固，下個禮拜好大機會「操」上去；但圖表派朋友則認為，現階段大市正處於調整期，若然回得深一點，對後市的升勢更為有利，不過，佢亦認為大市最多都係小回，恒指落到9300至9400水平已差不多。
國企調整，紅籌就發力，幾隻實力大紅籌股都呈強，華創（291）、招商局（144）、上海實業（363）、中遠太平洋（1199）同天津發展（882）等，都有幾個位進帳。國企雖然回軟，但未見有大盤沽售，正常的升後調整而已，留意低吸機會可也。
中國經濟增長迅速，企業盈利上升，民間財富膨脹，內地銀行有「水」滿之患，要「泄洪」，香港必然係首選地區，QDII的進程肯定會加快，據中資人士指出，QDII最快8月會成事，年底前會有「水」到。
近期港股成交增加，消息話已經有唔少中資偷步入市，目標係國企同紅籌，呢兩類亦正正係日後QDII會主力吸納的對象。既然港股下半年會有新水到，成交更活，則港交所（388）就買得過，呢一輪已經見到有唔少大行在港交所牌下活動，時掃時質，看來現階段仍是收集期，一收夠籌，就會開車。
呢排頻頻有新股上市（港交所收入增加，下半年重好景），其中隻玖源生態（8042）都幾紮實，值得留意。玖源主要在內地產銷化肥和化學製品，包括碳酸鈉、尿素、氯化銨及BB肥料，02年（12月年結）營業額2.77億元，升69%，獲利3134萬元，更升102%，主要是集團大力促銷的新產品BB肥料銷售激增，其毛利率由01年的6.9%上升到02年的17.9%，而集團整體毛利率維持在20%水平，與內地同業一般的毛利率15%至20%相若。
玖源上市集資所得，主要係擴展BB肥業務，根據統計，發達國家複合肥及BB肥的施用量，已佔總肥料施用量的80%及56%，而01年BB肥在中國的施用量僅為1%，市場發展空間極大，估計玖源未來幾年的盈利仍可保持高增長。
郭兆誠