我羅拉知道7.1遊行當日，全港市民情緒高漲，原來呢一日對身處喺日本嘅小倉優子嚟講同樣重要，因為佢擔正嘅廣告，亦都喺嗰日出街。佢當然叫埋成班親朋戚友擔定櫈仔，坐喺電視前面睇吓佢自己有幾威喇。
小倉優子雖然已經十九歲，但佢個樣重好似十四、五歲嘅小妹妹，所以仍然能夠成為日本「戀妹熱潮」嘅中堅分子，而且重吸納咗唔少叔叔同哥哥仔fans，難怪最近日本一間遊樂場，都要搵優子做代言人。
小倉優子喺廣告中絕不欺場，着住比堅尼上陣。
而為咗令優子喺廣告入面更加搶眼，工作人員重預備咗啲特殊嘅油畀佢搽，睇睇吓真係學足前輩吉岡美穗。不過，優子就辛苦好多，佢唔只要搽油，重要玩濕身，因為遊樂場入面有個水上遊戲，所以佢要搽油又淋水，之後先至用特技拼埋個背景上去。
之後優子又要着咗件粉紅色浴衣，力sell遊樂場嘅鬼屋。佢扮驚青之餘，重要扮喊到眼濕濕好可憐咁嘅樣，演技真係入木三分。優子拍完之後話：「我想像緊自己畀啲惡死嘅雞追，所以咪喊到出嚟囉！」睇嚟佢真係唔只扮驚青咁簡單，重要扮幼稚冧啲叔叔同哥哥仔fans，咁博法問你怕未？