愛華頓季尾優先簽李鐵嘅限期，到噚日正式完結，「拖肥糖」亦透過官方網頁，公布呢個消息，似乎有放棄呢位中國國腳嘅企圖。
愛華頓行政總裁鄧霍發表聲明中，除咗講簽李鐵優先權限期已過外，亦提到其他球隊可自由洽談呢位中國國腳，所以有傳想斟介嘅紐卡素、修咸頓、曼城，甚至列斯，𠵱家開始都可以公平爭李鐵。
雖然鄧霍話愛華頓收購李鐵計劃仍然傾談中，等領隊莫耶斯作最後決定，但我求大俠睇完呢個短短聲明後，的確覺得「拖肥糖」想放棄；如果有心留用嘅話，唔需要放消息話畀人聽，咁做有表明立場之嫌喎！不過，由於贊助商合約規定愛華頓陣中一定要有中國球員，如果放棄李鐵，來季就會有一張新面孔。
我求大俠噚日睇到段好好笑嘅消息，據聞祖雲達斯響○四至○五年簽入利華古遜嘅盧斯奧，連利華古遜發言人都冇否認。假如屬實，祖記就係繼買歷高達利後，再引入死敵羅馬嘅招攬目標。自從歷高達利事件後，兩會勢成水火，祖記今次咁做擺明又剃羅馬眼眉。
艾比亞落實加盟祖雲達斯後，講到明會義無反顧搶波交畀前面隊友組織，唔介意保持低調喎。祖記不嬲重用少說話多做事嘅人，艾比亞咁講嘢真係醒。又係嘅，艾比亞加盟後，祖記即刻外借巴拉斯，點知下次會唔會輪到自己被換走㗎，賣口乖有着數。
巴西二線兵響洲際國家盃嘅表現，惡評如潮，所以傳過佢哋會用番幾個猛將，踢今個月中舉行嘅中北美洲及加勒比海金盃賽。結果前日公布嘅森巴大軍名單並無驚喜，用嘅班底更年輕，最出名係幾個山度士球員。所以話呢，你有你鬧，巴西隊就依然故我，不愧係足球王國。
NBA夏季自由身球員市場今年風水輪流轉，老鬼最吃香。除咗三十歲嘅傑特外，另外四個最多人爭嘅球員：莫寧、披頓、柏賓同馬龍，最細嗰個都起碼成三張幾嘢，馬龍更加就快到四張㖭。佢哋嘅價錢唔算太貴，而且重打得又有大戰經驗，當然穩陣過啲開天索價嘅花靚啦！