大遊行之後，港股反覆，恒指升25點，期指則唔郁。暫時都係上上落落，直至「23條」去向明朗。下周三，反23條者包圍立法會，如果有事發生，則唔多妥；但若頑石點頭，或者有多啲議員投反對票，則港股隨時彈升三二百點。
大隻嘢中，中石油（857）比較弱啲，收2.20元，唔見15仙。隔晚油價冇壞到，不過油股冇運行，拖低中石油。中石油先一排升得咁多，回吐吓好正常，吼住進一步回吐之時，執多少相關Call輪博反彈搵餐晏仔。
中石油Call輪對象係9381同9232，9381壽命短啲，玩多3個星期就除牌，現價40仙，零溢價，槓桿率5.5倍，未來3星期，正股郁5%，隻輪理論上郁27%。9232今年11月至夠鐘，現價62仙，負溢價2%，槓桿率3.5倍。有排至到期，先有負溢價，係因為計埋到期前有1次唔細嘅中期息派，亦可代表正股再升嘅潛力有限。
中海油（883）先排冇中石油升得咁多，昨亦跌得少啲，收11.40元，跌10仙。吼住跌到11元邊邊，趁低買些少Call輪9535。隻輪年底到期，現價16.8仙，溢價4%，槓桿率6.8倍。
「鞋王」裕元（551）又嚟過，收20.75元，升80仙，唯一隻Call輪9878收32仙，升8.5%，隻輪明年1月到期，雖然好長壽，但溢價20.9%，槓桿率又只係6.5倍，唔係好博得過。溢價唔細，第日唔係咁易跟足正股上升。
章盛