法國雷諾車廠近年推出多款新車，如MeganeⅡ、LagunaⅡ同埋VelSatis等等，全都備受車迷追捧；到最近，糅合開篷車及Coupe轎跑車形象於一身嘅MeganeCoupe-Cabriolet，亦會正式推出。新車不但造型獨特，其玻璃硬摺頂更成為賣點之一；𠵱家不如一齊嚟先睹為快，睇吓新車有何吸引力啦！
新款雷諾MeganeCoupe-Cabriolet外形與現行MeganeⅡ車系相近，同樣來得極富時代氣息；不過最吸引會係佢所選用嘅玻璃硬摺頂配搭，不但喺關上篷頂後，能令車廂變得開揚外，使用時更只需輕按控制鍵，篷頂便會於22秒內完成整個開關過程。至於車廂方面，空間寬敞闊落唔在講，設備配搭又見齊全，而車內更備有多個安全氣袋及保護設施，以保障車上乘客於意外時嘅安全㗎！
廠方為選擇全新MeganeCoupe-Cabriolet嘅用家，提供有多台引擎作選擇，其中兩台分別係1.6公升直4（115匹），同埋2.0公升直4（136匹）型號，就最適合香港環境使用，皆因佢哋動力輸出充裕之餘，而且重有運轉寧靜及低耗油量嘅特性嘛！除此之外，一套歐式懸掛組合加上剛勁度十足嘅底盤配合下，行車時亦有頗高循迹性，令人倍見放心。