五十萬人大遊行，引發要求民主改革嘅呼聲。剛從港交所辭職出來嘅鄺其志，原來一早觀察到呢個現象。
鄺神童為人一向「古肅」，多一句說話都唔講，同佢做訪問保證冇料到，點知佢冇做港交所後未有正職，竟然喺香港電台節目《晨光第一線》主持一個環節「一首歌一個故事」，八方近日聽過佢初試啼聲嘅錄音，鄺神童播咗一首舞台劇主題曲《ImpossibleDream》，話首歌係講西班牙武士唐吉訶德為正義而戰，「明知不可為而為之」，聽落幾有佢喺細價股事件後喺立法會爆大鑊嘅影子。
鄺神童又引述六十年代黑人民權領袖馬丁路德金所講：「我有一個夢想」，去形容現時港人心情，相信港人嘅夢想係全民普選特首同立法會全部議員，佢話，市民對九七後經濟轉差，政府政策又倒行逆施好不滿，先有咁嘅想法。
個錄音應該喺7.1之前做，咁啱又應晒𠵱家嘅氣氛。讀者如想聽吓佢點講，下周一朝早記住聽港台。
傳真︰2623-9278
電郵︰