Brian媽媽說：「佢由小學開始就好嘴尖，隔夜餸一定唔掂，我唔講佢都食得出邊條係游水魚，新鮮就食好多，食食吓又會畀煮食提議。食嘢重視味道唔係睇價錢，佢細個已經好鍾意睇婆婆煮餸，成日都問－－咩材料？點樣煮？」Brian自小由廚藝了得的婆婆湊大，他說：「婆婆好神奇，無論炒餸、煲湯、煮糖水，全部都好味，細個成日好期待返屋企食飯，又好想學識晒婆婆煮嘅餸菜。」
太愛廚房的Brian升中時選修廚藝飲食，這時期父母正忙於工作，每天Brian都要自煮兩餐，他利用這機會把課堂學到的理論，放在兩餐中實踐，像自製醬油炒烏冬和番茄醬蒜茸炒飯，統統都是在傳統中注入新意思，加上經常參考日本雜誌，他在腦子總反覆問：「點煮先可以靚？咩配搭會好味呢？」天天以實際行動求答案。很羨慕Brian的積極上進嗎？嘗試從四方八面發掘自己的潛質吧！
喜歡煮的Brian也很識食，有見坊間的涼拌青瓜，只伴粉皮與花生醬，不然就是拍碎拌蒜茸。花生醬較油膩，生蒜茸又不是人人受得，咁就不如給青瓜配個新拍檔－－拌雞絲和粟米。涼拌醬是加料的泰式酸辣醬，一碟紅紅綠綠刺激食慾的新口味正式出場。
用咩料：
溫室青瓜 2條
甜粟米 1條
雞胸肉 1/4磅
指天椒 少許
醬汁：
番茄醬 2湯匙
酸甜醬 2湯匙
砂糖 2茶匙
水 1湯匙
夏天看見「漢堡」二字，腦海裏即時浮現肉餅和芝士，哇，漏到呢……諗起就無胃口，但Brian卻有本事將「漢堡」變成悶氣全消，清涼爽快的涼拌，Brian參考雜誌的菜式造型，保留漢堡的形狀，只換餡料，以番茄當麵包，攤凍的炒蛋取代芝士，加埋生菜、鮮洋葱及自製沙律汁，巧妙的心思給漢堡來個美味大平反。
用咩料：
番茄 2個
雞蛋 2隻
洋葱 1個
生菜葉 數片
醬汁：
麻油 2湯匙
白醋 11/2湯匙
豉油 2湯匙
砂糖 1湯匙
好易煮
1.炒蛋較烚蛋易消化，而炒嫩滑鬆軟的靚蛋秘訣在於「兜得快」。雞蛋加半茶匙鹽和雞粉，拂勻；以兩湯匙油起鑊，倒入蛋漿後，不斷快炒，約20秒便可盛起，待涼。
2.洗淨蔬菜，生菜撕成細塊、番茄切片和洋葱切丁。
3.先落豉油，然後是白醋及麻油，最後加砂糖。把洋葱粒、生菜葉和炒蛋放在番茄片上，逐層填滿。最後淋醬汁，咁就食得嘞。
煮食小貼士
‧洋葱切頭切尾後去掉外皮，用清水浸片刻，到落刀時，就不會令你流淚。
‧想青瓜船的弧位夠彎，可用小茶匙刮瓤。
‧利用切掉的青瓜頭和尾，磨瓜肉，片刻會出現一層白色泡沫，用水沖洗，就可去掉苦澀。