五十萬人（其實點只咁少）上街反23兼倒董，阿董果然有能力「團結」港人。阿虎醒多你一招，就係向市民叩頭道歉，擱置23條，踢走阿松或楊永強平息民憤，放葉劉大假或者唔好畀佢上鏡，免得進一步激起民憤，然後自己升上神台不干預朝政。
不過，以阿董嘅性格，一定好想強行立法，要做香港之死嘅元兇，阿虎真係唔敢想像7月9日有乜事發生。唔少基金噚日買定好淡期權，迎接呢個預期內嘅大波幅。雖然外圍股市表現不俗，但港股噚日只升25點，收9602，但成交卻增加至91.68億元，內裏似乎暗藏殺機。
中石油（857）噚日勁插6.4%，收報2.20元，成交達5.3億元。美林調低中石油投資評級至沽出，市場亦盛傳股神出貨，是真是假則不得而知，不過睇嚟大戶已開始出貨。
展鴻（572）上市前已多風多雨，上市首日較招股價低35%，收報0.80元。據聞有人任由股價跌，然後慢慢收集，等待時機再發圍。
東魅（198）引入民企老闆覃輝入股一事受阻，證監唔批准豁免全購，今次唔知點收科？e莉莎話，聽講證監唔認同覃輝及德祥企業（372）並非一致行動人士，換言之覃輝一係放棄入股，一係提出全購。東魅原計劃發行18億股（3億股已配予投資者；5億股將配予德祥企業；11億股配予覃輝），配股價為每股4仙。東魅噚日大跌12.5%，收3.5仙，唔通預示入股交易可能告吹？
阿虎