前日7.1回歸紀念日，大家為咗倒董，搞到有成五十萬市民上街遊行，有唔少導演同幕後人員上街支持，但當紅歌星、藝人就欠奉，可能好多人會覺得奇怪，點解啲偶像藝人冇晒影，唔通佢哋好支持23條？好滿意董特首政府嘅表現？同大部份市民脫晒節？非也！
其實好多藝人都係唔贊成23條，但因為受壓力，又或者要睇住內地市場，所以唔夠膽公然攞個良心出嚟。
原本有幾位藝人公開表示會上街，但最後因經理人公司通知佢哋話：「老闆同內地政府有生意來往，你哋千祈唔好去遊行。」結果7.1當日佢哋果然冇上街，重有一位話明要上街嘅性格演員，自己嗰日唔去遊行不特止，重打電話畀某藝人勸佢唔好去，免得罪內地政府，真無恥。
早排鍾楚紅去咗布吉幫雜誌《美麗佳人》影相，紅姑向來注重環保，每次食完飯，佢都會將食剩嘅餸包走，而佢又會同酒店啲職員講唔使清潔人員幫佢每日換毛巾同床單，減少浪費資源。紅姑又話之前見過青藏高原嘅細路仔，因為臭氧層受破壞，班細路仔唔夠六歲就盲咗，所以紅姑唔打算生BB，因為世界太亂，佢唔想細路仔嚟到呢個世界受苦。
楊思琦同無綫兩個是非天后佘詩曼同埋郭羨妮，合作拍《無名天使3D》，而阿佘一開始就同楊思琦講話一定會有是非，叫佢有心理準備，阿佘果然神機妙算，開拍冇耐就有報道話阿佘同郭羨妮夾攻楊思琦。噚日喺廣播城見到楊思琦，佢好淡定咁話：「我唔覺得俾人杯葛，可以同佢兩個合作，我好開心。」
黃百鳴同黃玉郎噚日出席喺中環舉行嘅「明愛華德中書院」記者會，佢哋話嚟緊有好多合作大計，首先今年會先開拍《新龍虎門》，下年就會拍《神兵》，兩部戲都係由黃玉郎筆下嘅漫畫改編，所以黃玉郎會做顧問，而《神兵》呢部戲就會搵成龍客串十日，做謝霆鋒個阿爸，女主角重諗緊人選。
台灣藝人陳栢霖噚日嚟咗香港宣傳佢有份主演嘅新片《藍色大門》，佢一直俾人話似謝霆鋒，陳栢霖噚日喺油麻地接受訪問，佢用國語話：「新人經常會給人說像誰，但沒有所謂，我並不介意，而我覺得藝人去夜店都是想減壓，我偶爾都會去，但都很正常。」
