曼聯領隊費格遜小器就係人都知，邊個球員得罪佢，肯定冇得留低；唔知華朗係咪恃住自己有好路數，所以就明知山有虎，偏向虎山行，踢爆老費鍾意喺更衣室亂掟嘢。
華朗日前接受《每日鏡報》訪問時話，老費一唔高興球員嘅表現，就會立即嚟料，喺更衣室內亂掟膠水樽，但就兜翻老費唔係有心咁做，只係想發洩心中不滿；記得史譚兩年前喺自傳內公開老費嘅惡行（話老費亂發脾氣），結果即刻被賣去拉素；而華朗𠵱家咁講，照常理嚟講之後實冇運行。
係人都知華朗想離開曼聯，加上𠵱家好似有幾間意甲聯球會斟緊佢過檔，或者係咁佢先咁夠膽行出嚟唱衰老費。
波勒喺拜仁雖然係踢進攻中場，但因經常回防助守，加上攔截夠準，所以俾德國權威足球雜誌《踢球者》選做上屆德甲最佳防守中場。雖則波勒講過最想踢嘅位置係防守中場，不過最煞食始終係佢嘅入球能力，相信拜仁教練希斯菲特同德國教練禾拉亦唔會畀佢願望成真。
講開德甲聯，佢哋個聯賽會同當地電視台斟掂啲轉播問題，喺禮拜一證實，新一屆會喺八月一日正式展開，重會由衞冕冠軍拜仁揭開序幕，喺主場對住升班馬法蘭克福。𠵱家離新一屆德甲聯開始得番一個月唔夠，球迷自己要做定功課，重要記得昅實《蘋果波經》嘞！
英國《太陽報》前日大大隻字話史譚下屆會返英格蘭加盟阿仙奴，重話會喺四十八小時內決定；消息傳出後冇幾耐，史譚經理人即刻出嚟否認，話一定唔會返英超聯，就算走亦只會去一支頂級意甲聯球隊。可能英國《太陽報》知道揩咗嘢，之後冇再報道亦冇跟進，當冇事發生過就算。
河床雖然提早贏咗阿根廷秋季聯賽冠軍，但係就講明慶祝活動只會低調進行。點解會咁？之唔係佢哋死對頭小保加𠵱家揸住半隻自由盃囉。話晒自由盃喺美洲足球界都好有地位，如果真係俾小保加攞咗，就算河床𠵱家成為阿秋聯冠軍，成就都唔及小保加大，費事樣衰，咪低調啲囉。