自推出以來，一直備受車迷追捧嘅歐寶Corsa，廠方最近宣布會為其推出改良版，除外形稍作改動，望落更富吸引力之餘，全新Twinport引擎技術，能令車子有更低耗油表現㖭！
經改良後嘅歐寶Corsa，造型雖看似沒有多大改動，但當細心留意下，不難察覺新車用上全新鬼面罩及頭燈配搭，加上同屬新設計嘅頭尾泵把組合，一份年輕活力感可謂盡在不言中。車廂布局方面則依舊以實用為主，絕無花巧之作，輔以承托力十足嘅座椅及闊落車廂空間，可謂乘坐舒適度十足。
最大改動莫過於引擎配搭方面，兩台全新1.0及1.4公升Ecotec引擎，備有廠方最新嘅Twinport技術，不但有出色動力輸出數值，就連耗油量亦會較現有型號來得更低。未知身處香港嘅車迷，有無機會與新車見面呢？