香港演藝界昨日上街響應7.1大遊行，為反對《基本法》23條惡法，以及對董建華為首的特區政府表示不滿，以導演張同祖、陳嘉上為首的演藝界代表，為人權和創作自由振臂一呼，並勸喻政府聽取民意，不要再做鴕鳥。 記者：陳月媚、陳月萍、陳梅香、卓美娟
【本報訊】昨日的7.1大遊行，演藝界的知名導演徐克與施南生夫婦、杜琪峰夫婦、陳可辛、張堅庭、岑建勳與謝寧夫婦、許鞍華、陳嘉上、張同祖、邱禮濤、方育平、陳慶嘉、演員林建明、樂蓓、寶珮如、鍾慧冰、江欣慈、周文健、王喜、魏秋樺、吳君如、杜汶澤和女友田蕊妮、歌手黃貫中、DJ蘇絲黃和陳海琪、無綫助理製作總監何麗全等均以市民身份上街，藉此表達對《基本法》23條及以董建華為首的特區政府之種種不滿。
身穿白恤衫的陳嘉上導演昨日與張同祖、鍾繼昌、武指董瑋等一起遊行，陳嘉上說：「我今日係為咗反對23條而嚟遊行，呢條法例對中國係百害而無一利，港人出嚟遊行唔單止要保護港人，重要保護中國，23條係陷中國於不義。我今日唔係以導演身份嚟遊行，係以市民身份，其實之前演藝人協會同導演會曾經談論過，究竟用唔用個會名義去遊行，但因為有部份會員認為唔應該參與政治，所以唔贊成用個會名義，咁大家咪隨心以個人名義嚟遊行，我唔擔心因為呢次遊行會影響自己到內地拍戲。」
陳嘉上在遊行結束後再接受訪問，他激動說：「有咁多人上街，我為香港市民感到驕傲，不過今日嘅遊行係有啲混亂，顯示出港人唔夠組織性，不過好彩大家秩序幾好。」
許鞍華導演日前始由雲南回港，昨日她出席遊行是為了反對23條，她說：「我返咗內地拍戲已經有半年時間，所以我對23條唔係咁清楚，不過我知道呢條法例對言論同創作影響好大，所以我一定要出嚟遊行，以示不滿。」
張同祖眼見數以十萬計市民上街遊行，在遊行途中表現得相當激動，曾振臂一呼，為港人的團結精神感到驕傲。對於只有小部份歌星、藝人上街遊行，張同祖認為：「我覺得係隨心嘅，所以人多人少都冇所謂，我自己除咗反23條外，對政府亦都係有好多不滿意嘅地方，政府應該聽吓民意，唔好再做鴕鳥。葉劉淑儀嘅嘴臉簡直係話之你，呢啲係乜嘢態度？雖然政府幫港片入內地市場，但人權同開放市場係兩件事，唔可以混為一談。
「今次有咁多人上街，我希望政府可以採取積極態度回應市民嘅訴求。不過我覺得呢個政府擺出嚟嘅態度就係使乜畀面你呀！特區政府係冥頑不靈，係都要強行立法，市民有乜辦法唔感到憤怒？」
近年來十分低調的香港金像獎導演方育平，昨日亦因為不滿港府倉卒為23條立法，所以聯同其他導演來參加大遊行，他說：「我相信呢次係最後一次嘅合法性遊行，雖然我未必可以阻止到呢條惡法正式成立，但呢條惡法，對日後電影創作有好大影響，為爭取權利和創作空間，我都要出嚟遊行，以示不滿。」
導演林德祿雖然很久沒有拍片，但他昨日亦偕同不少電影界好友一起參加遊行，林德祿說：「每一個香港人都有責任保護香港嘅言論自由，23條係違反一國兩制。我對呢個政府亦有好多不滿，所以今日咪一次過出嚟遊行，表達不滿囉。」
杜琪峰昨日沒有跟隨演藝界大隊一起遊行，不過他一早已表明會出席遊行反對23條和倒董，所以身穿一身黑衣的杜琪峰由維園行到中環，他對有如此多人參加昨日遊行感到欣慰。
