荷李活女星麗絲蕙絲潘（ReeseWitherspoon）喺前年嗰套《律政可人兒》裏面扮演一個巴巴喳喳嘅法律系學生，呢部戲都可算係佢從影以嚟嘅代表作。
續集《律政可人兒2》話咁快又就嚟上畫，不過𠵱家懷住第二胎嘅麗絲蕙絲潘，前日同埋老公賴恩菲臘（RyanPhillippe）去紐約出席首映嗰陣時，突然變身肥師奶，走樣走得好緊要！
一向俾人稱為索女嘅麗絲，自從九九年同賴恩菲臘結婚之後，已經有個三歲大嘅囡囡。早排麗絲話佢老公想追個仔啫，轉個頭佢就話有咗喇，認真神奇。現時有咗五個月嘅麗絲，前日出席首映，從前係加細碼嘅佢，胸前忽然升級，突然變咗巨乳娘一名，都咪話唔驚！
另外，麗絲去完首映之後，重接受咗MTV電視頻道嘅訪問，估唔到MTV台方面都好周到，搵咗個專人幫大肚婆按摩雙腳，搞到麗絲不知幾冧。唔講你唔知，原來麗絲好錫自己對腳，平均一個月用成十五萬港紙買高踭鞋扮靚靚，不過佢𠵱家大肚唔可以成日着呢類高踭鞋出街，惟有喺屋企當拖鞋咁着住先喇。