吳君如與陳可辛及杜汶澤與田蕊妮這兩對情侶，昨日結伴上街遊行反對23條立法，其間君如雖身體不適，但仍堅持行畢全程。而正在籌備開拍《金雞Ⅱ》的陳可辛，昨日更即興讓吳君如向遊行隊伍借抗議牌，為《金》片拍攝遊行片段，讓在第一集見證了香港二十年歷史的金雞，在新一集見證這一個倒董大時代。
吳君如和導演男友陳可辛、杜汶澤與女友田蕊妮及杜可風等，昨日與一眾圈外朋友一行約三十人，於下午三時半結伴往維景酒店，然後一起參與7.1大遊行。眾人行了一個多小時後，只到達銅鑼灣富豪酒店附近，及至五時左右，吳君如表示身體不適，於是眾人便前往富豪酒店的咖啡室稍作休息，進食後再繼續遊行。
吳君如表示自己患上感冒近三個星期，至今未痊愈，但仍然堅持參加遊行，而且要由頭行到尾，她說：「唔係嚟做乜呀！」
問到君如今次上街遊行的原因，她說：「遊行係一種宣洩，香港人唔係懵吓懵吓，呢幾年大家都目擊咗政府做咗啲乜，梗係要遊行，表達自己意見啦！遊行嘅目的都分唔得清楚，唔止大班（鄭經翰）件事，重有佢哋（指政府）啲嘴臉。溫總理（溫家寶）噚日都留低咗說話，要佢哋做啲決定性嘅嘢。」
而陳可辛則表示23條是令巿民上街的導火線，他說：「好多巿民都唔happy，我今次嚟係盡公民責任，用行動表示自己不滿，每晚睇電視睇到都嬲，政府有好多方法令大家舒服啲，但都唔去做。我唔會奢望政府可以改到幾多，葉劉淑儀都講咗唔會有反應。香港七、八成人有反對聲音，呢啲唔係政治化嘅嘢，已經超越咗政治，我自己係代表公民身份，冇政治目的。」
陳可辛即將開拍電影《金雞Ⅱ》，昨日更即興在遊行現場取景，與吳君如行至金鐘時，在遊行隊伍前舉牌拍攝。陳可辛說：「橫掂都係咯，唔使買新聞片，喺度拍得啦。」
而吳君如則說：「個牌係我向遊行隊伍啲人借嘅，我冇叫口號，只係做口形，到時再配番對白上去。金雞係講香港歷史㗎嘛，套戲梗係有大遊行嘅嘢啦，今日陳可辛製作公司嘅人會喺現場拍一啲環境。《金雞》第一集係講二十年前嘅嘢，第二集係講今年發生嘅事，今年咁多事發生，冇理由唔講，預計八月會開拍，劇本都差唔多出晒。」
其後陳可辛又補充說：「本來我諗住今日喺遊行嘅地點搵埋二十三個女仔搞開鏡，但一嚟造型未搞掂，二來唔想搞到咁寸，好似搞事咁，所以取消咗。」他又表示因香港今年正是多事之秋，所以才有開拍《金雞II》的念頭，陳可辛說：「因為金雞係香港人嘅喉舌，君如嘅角色係典型嘅香港人，我本來冇諗住拍第二集，但今年咁多事，有好多題材值得寫，香港人情緒高漲，好似梁錦松偷步買車，成為茶餘飯後講吓笑吓嘅話題，我覺得冇乜問題。」
採訪：楊潔雯
攝影：何國豪
