香港特區政府有鋪干預癮，當正自己係大家長，市民係細路。老竇想你哋好啫，點解你哋咁頑皮，咁唔聽話？樓價跌，老竇要托；太重視洋文，老竇要用母語教學。唉吔，點知𠵱家你哋啲英文咁水皮，老竇要搞一個「語文教育及研究常務委員會」，發表一個《提升香港語文水平行動方案》，再搵曾蔭權（大概佢平時已經冇事可做）擔任「跨」局高層督責委員會主席，負責落實，提升語文水平。
其中一項建議就係「研究如何確保本地電視台所製作的節目質素，包括主持人的粵語、普通話及英語讀音正確。」呢項建議如果落實，馮華健、唐英年必定拍爛手掌，因為廣管局、唐局長唔使做衰人，就可以引用呢項建議，迫到鄭大班封嘴，入補習學校讀多幾年廣東話發音先至准佢再出山。董特首上電視、電台，亦唔可以用廣東話發言！為咗朝鮮（焦鮮）、時間（時奸）、報刊（報慷）、「發行」（發杭）……等等發音，各派人士會大打出手，此外，江澤民啲普通話發音唔正，毛澤東更加唔掂，佢哋演講，一律禁播……
一張報紙報道「語常會」建議，用咗一條大標題：《政府擬迫大學收生英文達D》，左丁山要睇幾次先至明白，嗱，啲中文肯定不入「語常會」主席田北辰法眼（佢係DBS校友，理應識啲中文），將來「語常會」又需唔需要「確保正確」呢？唉，政府管得太死，沒希望。