七一大遊行和平完成，港股後市可能較為明朗，恒指喺9600水平搵到支持，可以選擇性買入藍籌Call輪，博恒指遲吓再上試一萬大關。
滙豐（005）由兩周前最高97.50元向下調整，已有5元，未來幾日如能繼續守住92.50元現價，不妨買些少Call輪，搏殺對象係月杪夠鐘嘅9704，現價27仙，溢價0.8%，槓桿率34.3倍。呢隻輪嘅爆炸力與殺傷力都非常勁，正股郁三兩蚊，隻輪可升1半或者跌1半。如果唔想咁刺激，則揀啲壽命較長嘅Call輪。
和黃（013）再有長實（001）增持，股價若然再跌，相信長實仍會繼續出手。和黃反覆變化中，可趁每次下跌之時，博Call輪9765同9796，等正股反彈即刻套利，實行短炒。9765喺9月到期，現價19.4仙，溢價7.2%，槓桿率24.5倍。9796喺11月到期，現價53仙，溢價3.5%，槓桿率9倍。
長實近日表現略遜於和黃，和黃若然回升，長實亦會得益，吼住長實進一步回軟之時，執啲長實Call輪短炒博反彈，對象係9764同9829兩件，前者爆炸力大，後者數據實際。
呢幾日，九倉（004）好反覆，現價15元，若再回落番上次低位14.50元，買隻Call輪9638博反彈。呢隻輪明年1月到期，現價9.1仙，溢價唔低，可以炒而唔可以揸，揸得耐易輸溢價。
章盛