豪宅市況近排氣勢如虹，成交多之外，睇樓氣氛都好熱鬧，聽講上個禮拜至開放參觀嘅太古甘道三號豪宅，一連十日嘅預約睇樓檔期已經爆滿，想要睇樓就要等吓嘞。
甘道三號嘅開放時間係早上九點半到下午六時，每半個鐘一場，即係一日可以畀十七枱客睇樓。由於樓盤嘅四間屋都會開放，所以啲客一定會睇晒然後做比較，半個鐘頭睇怕多數都唔夠用。
太古只係公布三號屋叫價六千八百萬，面積4378方呎，連1558方呎花園。其餘三間值幾錢，啲客睇完之後應該心中有數。
近排一億樓下嘅豪宅買賣明顯多咗，港九新界都傳出有成交，表現絕對唔差過百萬樓下嘅細價樓。
早排非典型肺炎肆虐，搞到樓市交投銳減，代理行4月收入勁減，為度過難關，中原地產大減後勤員工底薪，有啲幅度逾一成，做員工嘅梗係唔開心啦。
不過，集團主席施永青都唔係咁冇人情味嘅。中原營業董事劉瑛琳向蘭西爆料，話施老闆見疫情過後，生意好番，5、6月連續兩個月都有錢賺，上半年埋單計數，有利潤，宣布所有後勤員工，都有四分一個月花紅分，可以幫補一吓。
公司有得賺，點都值得高興，起碼唔使擔心可能又要再減人工。
啱啱賣完青衣藍澄灣冇耐嘅和記黃埔地產，睇嚟就快又會有樓盤推出，不過會係深圳樓，點解咁講，因為發展商明日開記者會，內容係關於「深圳置業」探索同分析。
特別嘅係發展商搵埋戴德梁行一齊，認真畀面代理喎！唔通佢哋好似藍澄灣咁，搵埋代理幫手賣內地樓？記者會地點喺紅磡黃埔號一樓，即和黃專做內地樓盤嘅展銷廳。
地產代理監管局成立之後，不斷監察代理工作，希望行業更加規範化。
對做得唔啱嘅代理，加以處分，例如暫停牌照，以至撤銷牌照等，睇地監局嘅刊物，都見到呢啲紀錄。
蘭西收到最新一期刊物，有單代理偽造文書而被判緩刑個案。
話說該名代理接到委託後，冇做查冊。等到地監局查詢時，佢怕犯例，就補番查冊，然後更改紀錄日期，以為可以「過骨」，最後畀地監局發覺報警，代理被控「偽造」同「使用虛假文件」兩項罪名，判入獄兩年，但緩刑兩年。
蘭西
電郵地址：