陳冠希（Edison）、女子組合Twins、何超儀同鄭伊健等，前晚去咗陽明山莊出席電影《千機變》慶功宴。一眾演員重一齊進行點火把儀式，寓意將一千五百萬票房數字點着。
Edison一向有「𠝹女王」嘅稱號，佢近排被影到同趙頌茹（阿Yu）出入餐廳，日前又被發現「翻𠝹」MaggieQ，Edison話：「我嗰日約咗日本朋友，原來佢哋都識MaggieQ。」Edison表示呢次嘅緋聞同阿Yu嗰單唔同，Edison不滿咁話：「寫我冇所謂，不過我唔鍾意俾人放入陷阱。」
問Edison究竟阿Yu有冇打電話同佢解釋，佢話：「阿Yu冇呢啲能力，要道歉嘅人係佢公司，佢公司𠵱家應該好驚，佢哋冇諗到我會咁講嘢，但我入行三年，熟識我嘅都知一定唔會咁做新聞。我真正嘅圈中朋友唔多，有BoBo（陳文媛）、Eason（陳奕迅）、何超儀、謝霆鋒同楊千嬅，呢啲都可以信得過。明白我嘅人都知我冇時間追女仔，我好專注事業！」
黃榕噚日下午去九龍城派米同即食麵畀長者，吸引咗大批老人家烈日下排隊輪米。黃榕透露自從信咗四面佛後，加上早排智慧法師送咗一個開光佛像畀佢，令佢即時工作量大增，重接拍咗一齣電影扮栢芝。問佢何解七一着白衫又唔去遊行，佢話要派米，重話信佛要着白色衫喎。
黃伊汶噚日喺鑽石山為「勁爆HipHollywood舞林大會」擔任評判，佢重特登同啲舞蹈員齊齊着黑色衫支持大遊行。講到有報道話佢要求舞蹈員剪短頭髮同着低胸衫，伊汶話：「其實係同排舞老師一齊諗出嚟，當然好開心佢哋肯為我剪頭髮啦。佢哋好敬業，但篇報道咁講對佢哋好唔公平囉。」
宣萱噚日在將軍澳電視城為無綫新劇《樊梨花》開工，講開噚日嘅遊行，佢話：「我屋企人都有去，我自己就要開工，連瞓覺都冇時間，我今朝起身乜嘢都唔記得晒，所以冇着黑色衫。」問到佢好朋友古天樂同鄭秀文嘅戀情，佢話：「我哋好少聯絡，nocomment，男未婚女未嫁，私人事佢自己會處理。」
劉松仁噚日喺將軍澳電視城為無綫新劇《玉緣》開工，重專登着件黑色衫返嚟，佢話：「因為我今日唔得閒去遊行，所以只有着件黑色衫支持，既然今次咁多人去反對，政府應該延遲去立法畀多啲空間大家，好過搞到𠵱家咁。就算冇用都要表達吓，如果唔出聲中央就以為特區做得好好。」
