ChoroQ係乜？如果你嘅答案只係迴力車，咁證明你係一個勁Out嘅老餅玩家！答案係巴士、貨櫃車、Type-R、AE86，只可以證明你係一個收集狂！其實日本嘅ChoroQ文化，已經玩得非常癲，出ChoroQ景品擺設、電玩《Q版賽車》、PHS手機遙控ChoroQ，玩法多到你唔信。至於最潮玩法，就係配合MSDUO變身做MP3Player！手指頭咁大就可以播歌、錄歌兼插擴充記憶棒，呢部MusicChoroQ今個星期剛殺抵本港！
記者：朱崇德 攝影：陳盛臣
呢部最新抵港嘅日本音樂專車，取名為MusicChoroQ（MCQ），車款係勁可愛嘅Beetle，驟眼望落去，真係同一部普通ChoroQ冇乜分別，不過當你一翻轉車底，就會發現所有MP3功能按鍵，好似音樂播放、選曲、調校音量功能，全部收藏在底盤之內！唔影響外觀，又達至MP3Player功能，值得一讚！
不過最令人驚訝的，都莫如細到好似火柴盒嘅車身（36×27×52mm，重30克），竟然有擴充記憶體插槽，車身全無內置記憶體，想錄歌就要用跟機送嘅64MBMSDUO，錄音模式有66kbps的普通模式（約可收錄120分鐘音樂），同105kbps的高音質模式（可收錄80分鐘音樂），可能因使用SONY嘅MS，所以錄音格式都係SONY獨門嘅ATRAC3！嫌唔夠長？可以用條128MBMSDUO（約$800），就最長有240分鐘喇！
唔好以為錄歌會好麻煩，又要駁電腦又要CardReader，方便就方便在佢好似一般MD機，以光纖接駁線將數碼音源直入MCQ內，所以錄歌時就好似一般數碼錄音筆一樣，㩒個REC.掣就搞掂，就算冇電腦底嘅用家，一樣可以用得好開心！
咁細架車，電源都會係一大問題，為咗令車身外形美觀，用咗內置式電池，每次叉電3個鐘，播放音樂時間都係3個鐘；為咗慳位啲，叉電組件用外置式設計，不過鬼馬處係整到好似「違例泊車轆鎖」咁款，真係不得不佩服日本仔的鬼主意！據說明書呢粒電池大概可以叉電500次，如果行行吓街冇電，就可以用跟機送嘅3A電（×4）外置電池盒，插住嚟用閒閒哋都可以用成20粒鐘，都算想得幾周到。不過咁細架車陀住咁大個電池盒，「Q」嘅程度大減！
ChoroQ最早於1980年初次登場，首先被商品化的為ASeries，一賣就是二十多個年頭；ChoroQ在香港又名迴力車，最過癮係佢根據真實車款，再加以Q版化，內置嘅摩打迴力非常強勁，最遠可向前滑行近10米！呢期Hit款有車身「拉花」嘅Type-R、掃把佬同漫畫《頭文字D》㗎AE86！不過話玩得激，都可算係日本仔近年新興，用PHS手機作遙控嘅CHOROMODE，用手機駁無線發射器，控制架ChoroQ行前後左右！
售賣點：JCSHOP
地址：銅鑼灣時代廣場8樓833號舖
電話：31022783