唔計六四嗰次，噚日係小初呢十幾年來唯一一次上街遊行。天氣咁熱，估唔到重有咁多人遊行，可見民怨之深。大遊行之後，今日個市唔知會係乜嘢光景？
小初噚日一路行一路鬧經紀黃，又話亞倫國際（684）周一公布全年業績會有睇頭，點知業績倒退4%，只賺5759.8萬元，股價應聲下跌。早知買同樣係周一公布業績嘅嘉利國際（1050）好過，嘉利盈利勁升48%，股價升4.34%，收2.40元。
經紀黃話，亞倫業績倒退呢件事，其實跌眼鏡唔止佢一個，好多芬佬亦一樣。至於嘉利，佢就話無謂再憧憬，咁靚仔嘅業績，真係可一不可再。
經歷過匿名信事件的展鴻（572），將於今日掛牌。經紀陳就話唔睇好，但原因絕對唔係因為匿名信影響。
據講展鴻圍飛之時，正好係民企股令投資者大失信心之時，所以相當難搞，直至股壇大姐大出嚟幫手，先至搞得成，但以大姐大嘅往績，如好耐之前嘅香港通訊（248）同金龍船（318）嘅表現，大家應該心裏有數。
慕容小初