回歸六周年，來一個反政府大遊行，想唔到有六四當年咁勁，可知以董建華為首嘅特區政府幾咁不得人心，啲市民一叫「董建華」個名，就有好多人大聲高呼「下台」，民心向背，完全清楚。
如此盛會，當然唔少得《蘋果》肥老細黎智英，佢同漫畫家尊子下晝兩點幾已經去到維園，塞咗三個幾鐘頭先至出到維園，由中央圖書館走出電車路，沿途有人認得佢，搵佢簽名，八方問佢點睇今次遊行，佢話，「我諗係23條撩起大家反阿董，阿董搞到咁，重要夾硬立法。」又話，「已經窮，重冇埋自由，已經冇飯食，重冇埋自由，佢有冇搞錯？你估香港任你玩？」
黎智英今次專程由台灣返港遊行，佢話好明顯睇到香港人條氣好唔順，大家都好嬲；新聞自由，梗係重要啦！
六四同反23都上過街嘅黎智英，覺得今次遊行好成功，重好關心總共有幾多人上街。問佢香港會唔會好似台灣咁變天，佢話，「點都有啲改革啩，已經搞到天怒人怨，23條重夾硬嚟，唔通想暴動？暴君都唔會咁，佢唔會戇居得咁交關啩！」
（圖）肥佬黎同尊子（左）行行吓，被途人認出攞簽名。黎樹雄攝
傳真︰2623-9278
電郵︰