貴為日本汽車業一哥嘅豐田汽車，於日前公布咗連旗下大發及日野汽車計算在內嘅五月份製造、銷售及出口數據，其中日本本土銷量更錄得強勁升幅㖭！
先講講汽車製造方面，豐田於全球嘅生產線合共產製出491,166部新車，較2002年同期上升3.8%，大發為48,805部，上升幅度為5.7%，而以製造商用車為主嘅日野，則有5,685部，升幅更高達32.5%。出口汽車數量方面，豐田為131,184部，跌7.7%、大發為5,774部，跌23.8%，但日野則錄得29.3%升幅，出口汽車數量達2,538部之多。
雖然產量及出口汽車數量都有大幅變動，但喺日本本土嘅銷量，三間車廠都錄得升幅，其中豐田為128,804部，較2002年同期上升5.3%、大發39,581部，升幅為9.6%，日野更錄得36%升幅，售出車輛數目多達2,533部；能有如此出色嘅成績出現，相信與三間車廠各自有多款新車推出，以及現有車款備受用家追捧有關。