早前炒得鏗鏗聲嘅鋼鐵股，竟然在七一大遊行之前回頭，唔通連中資都驚咗大遊行？重鋼（1053）跌3.6%，收1.60元，鞍鋼（347）挫1.7%，收1.73元，馬鋼（323）跌1.5%，收1.32元。有芬佬朋友話，港股過去兩個月累積升幅大，七一大遊行如果有乜差池，隨時會釀成暴動，投資者當然會先計數，睇清楚形勢後再入市。雖然七一大遊行結果冇事發生，基金暫時亦搵唔到大舉入市嘅藉口。
Charles陳旗下5間公司周一停牌，中策（235），錦興（275）及保華德祥（498）話停牌涉及全面收購；德祥企業（372）就話停牌涉及須予披露交易；珀麗酒店（149）就話停牌涉及股價敏感消息。
黑客話，Charles系內公司，股權架構複雜，睇到投資者眼都花埋，所以今次會做一次大手術，將系內公司進行架構精簡。據講可能將其中兩間公司私有化，並出售珀麗酒店，令到系內公司只剩兩間。Charles一向有殼王之稱，不過現時市況唔就，殼價唔理想，加上系內公司股價較資產淨值有大折讓，所以玩私有化好過賣殼。
惠理基金6月中入股超大現代（682）後，股價累升逾50%，收穫不俗，不過經過半年結後，超大表現如何則是未知之數。傳統智慧話畀阿虎知，即使超大重有得升，升勢都會放緩，加上市場選擇多，就算出現換馬活動亦唔奇。
此外，惠理基金聲稱增持偉易達（303）至5.13%水平，唔知後市重有冇得炒？不過，周一已經回軟，大跌4.5%，收6.40元。
阿 虎