前廣播處處長張敏儀(大姐)早幾晚為韋家晴(即係無綫高層陳志雲)最後一晚嘅《男人之家》節目做嘉賓,雖然大姐離開廣播處多年,但係佢對電台嘅一舉一動依然好留意。
大姐知道陳海琪同韋家晴因為唔滿意一台台長周偉材而離職,佢覺得港台走寶,於是主動同韋家晴講:「我知道你喺電台獲得嘅支持唔夠,以前有好多好嘅DJ好似陳海琪咁,都係因為支持唔夠而離職,不過,你再諗諗啦!」後來大姐重索性叫港台再搵海琪返嚟同韋家晴一齊做節目,又當面同在場嘅助理廣播(電台)處長邵盧善反映意見。
不過最搞笑係大姐做節目嗰陣,毫不留情咁批評一台最新嘅口號「七月有才氣」,話簡直不知所謂,如果佢重係處長嘅話,一定唔容許呢句口號出街,但係一台台長周偉材唔識死反駁大姐,激到大姐死死吓,做完節目之後,大姐當住全世界人鬧足周偉材十五分鐘。周偉材咁撐呢句口號,唔知係咪同佢自己個名有個「材」字,喺度搞個人主義有關呢?
組合Twins噚日接受商台訪問時話:「最近做緊套廣播劇《落雨路》,講我哋鍾意咗同一個男仔,但現實生活中,一定唔會發生呢件事,因為大家鍾意嘅類型都唔一樣,追求嘅嘢又唔同。」早排鍾欣桐睇豪宅,唔知佢揀男友係咪都要有錢呢?佢話:「唔係,我要嘅嘢好簡單,鍾意就得。」
唐寧、葉蘊儀噚日喺西貢拍攝新片《夏之戀》。唐寧拍咗成日戲,佢話自己都曬黑咗好多,唐寧重話:「我塊面好易白番,但個身就好難。」而葉蘊儀同演員吳銘鋒喺戲入面會發展一段忘年戀。問葉蘊儀現實生活中有冇試過忘年戀?佢話:「未試過,不過我唔會介意。」
有一段時間冇出碟嘅恭碩良(Jun)上個禮拜六應now.com.hk嘅邀請,出席《音樂第三現場》音樂會,Jun一人包辦咗主唱、彈結他同打鼓,去捧場嘅則包括有蘇永康、at17、同埋MiniCookies嘅Kary等等。呢個演唱會純粹以歌會友,所以演唱會製作用咗好多音樂元素,包括澳洲土著用嘅古老樂器Didgeridoo同埋印度樂器Sitar等。
噚日陳冠希(Edison)、鍾欣桐(阿嬌)同埋鄭伊健喺新加坡返香港,伊健帶頭喺閘口出嚟,Edison與阿嬌呢一對緋聞男女亦緊隨其後,不過佢哋就喺唔同閘口出嚟,Edison一出嚟就口黑面黑,問佢乜嘢事,佢話:「喺機場唔想講嘢。」之不過,喺佢見到fans之後又無事喎!
無綫上個禮拜劇集嘅收視大部份都有升冇跌,劇集《黑夜彩虹》平均收視有三十一點(約二百萬觀眾),比起對上一個禮拜升咗一點,而周六嘅大結局,最高收視重有四十點(約二百五十九萬觀眾),平均收視則係三十八點(二百四十六萬觀眾)。第一次飾演奸角嘅黎姿,雖然最終都要死,但都算死得有價值,至少可以為劇集帶嚟高收視。