做代理除咗要勤力之外，有時都要講吓運氣㗎，世紀21一手組代理瑪姬蕭有位熟客，介紹名美籍華僑佢識，個客一口氣買咗兩個寶珊道1號單位，夾埋一億，世紀21就收到百幾萬佣。
由於該公司經紀嘅分佣比其他行高好多，瑪姬蕭落袋嘅佣金睇怕都好和味。世紀21喺6月份嘅佣金比5月大增三倍，重係今年最多嘅一個月份。
聽世紀21發展商項目部聯席董事黃德華講，該名美籍華僑𠵱家喺香港未有任何業務，但就計劃嚟開辦事處，啱啱嚟港一個禮拜，對本港物業幾有興趣，結果用七千五百萬買入寶珊道1號一座頂層約五千七百八十三方呎單位，呎價近萬三元，計劃自住，另用二千五百萬買入同座高層B室，面積二千六百四十一方呎，用嚟收租。
今日元朗YOHOTown會繼續開放畀新地友好參觀，包括佢哋旗下電訊公司數碼通，好多地產經紀都話要去元朗，睇嚟新元朗中心又會重現周末萬人空巷嘅場面。
樓盤喺禮拜日開齋，賣咗個頂層「YO豪宅」單位，據促成嘅美聯物業呂志強話，係五座D室，一千零四十三方呎，每呎近四千蚊，買家係一對年輕夫婦，住青衣。美聯話已入票YOHOTown嘅準買家中，六成屬於三十歲以下年輕人，一半係區外客。
香港興業上個禮拜至話將東涌藍天海岸封盤，原來佢哋另有所圖，重部署推愉景灣海澄湖畔。噚日發展商召集各代理開會，講吓點樣推銷同宣傳，聽講下個禮拜會有一連串攻勢，大家不妨拭目以待。
發展商喺中環3號碼頭搭咗個新示範單位，重話明日會招待記者睇吓。
海澄湖畔一及二期聽講約有五百個貨尾，其中二期約佔四百個，由於單位價格係近排市場最熱賣嗰隻，加上同區冇競爭對手，所以發展商就加大銷售力度。
睇番資料，發展商喺5月曾經推過一批有對流窗單位，平均呎價約三千蚊，當時都幾好賣。
聽業內人士講，發展商搵代理賣樓，出手愈嚟愈闊綽，佣金超過兩個佣已經好平常，有啲就諗到個重吸引嘅方法，就係假如做到某一個數量嘅單位，佣金可以跳bar，而且以前做咗嘅單位都有佣加。
唔好睇小呢招，因為若果做豪宅盤或者大屋苑，一跳bar，隨時可以收多一百幾十萬，對公司嚟講，都咪話唔緊要。所以一到接近跳bar時，代理行高層都會催迫同事加倍努力，發展商又可以銷多啲貨，睇嚟呢招好快普及。不過二手樓喺發展商步步進迫下，真係難以翻身啦。
今日喺七一回歸大日子，兼有大遊行，最啱做宣傳，大收事半功倍之效。長實賣樓主帥趙國雄話，趁咁多人上街，會派一百至二百人沿途派傳單，重會派水同乾糧畀遊行人士。
趙國雄重話，映濤軒個售樓處咁啱喺中環，佔盡優勢。蘭西諗，如果遊行路線改道上售樓處做其中一站，一定有迫爆場面。問起趙生點睇遊行，佢就話：「愛國愛港就應該買樓，積極啲做嘢」。佢鼓勵市民不妨趁假日嚟睇映濤軒，重有HelloKitty禮品收。
蘭西
電郵地址：
