民主黨為咗抗議二十三條立法，十二個黨員由星期五開始喺天星碼頭絕食一百個鐘，噚日終於捱到第三日。主席楊森、副主席何俊仁同李永達都齊齊話難捱，尤其係佢哋坐得好近美心快餐，啲炸雞髀味真係引死人。
楊森一路摸住個成日咕咕聲響嘅肚，一路話自己身體開始好虛弱，今日嘅遊行都可能要用輪椅。八方真係佩服佢，雖然餓到暈，但噚日都堅持主持立法會講城大副學士被削資源嘅會議，佢話呢件事影響深遠，點都應該去喎。
絕食期間，楊森太太帶埋啲仔女去睇佢，最犀利係外母已經準備整一大鍋住家靚粥，等大家完成使命後大快朵頤。另外，李國寶前日都有去探班，噚日就有李卓人、張文光同劉慧卿去聲援。
（圖）民主黨絕食抗議，劉慧卿（左）去探班支持吓李永達（右）佢哋。
傳真︰2623-9278
電郵︰