早前抵港嘅萬事得M2，一直憑住富時代感嘅年輕化造型及實用車廂配搭，而備受車迷追捧；但今回代理為吸引更多用家，特別為其引入一套原廠包圍供用家選擇，只需花多$5,400，便可令座駕化身成一部小跑車，何樂而不為呢？
記者：鄭達基 攝影：陳偉林
原有萬事得M2嘅造型，本已來得富有時尚氣息，但加裝呢套原廠包圍（須另加$5,400，已連稅）後，卻見有一份跑車味道；事關佢備有車頭及車尾泵把連氣霸外，重有車身兩側裙腳、獨特車身貼紙、門邊雨擋及頂置尾定翼，望落真係好吸引。但略嫌欠缺車頭霧燈及合金胎軨配搭，若能加裝上述配備，相信效果會來得更好。
闊落車廂空間對現今汽車設計嚟講，可算係標準裝備之一，就連萬事得M2亦唔例外；雖然M2車長只有3925mm，但軸距竟達2492mm，可想而知，佢嘅車廂空間係幾咁闊落。另外當遇有需要時，後排座椅可整幅收摺起，又或者將椅背左右收摺放平，從而可擺放較大型嘅行李，甚至有如廠方所講，連兩部爬山單車都擺得落。設備方面亦都好齊全，喺極富CyberFeel嘅中控台上，除備有原廠冷氣及高級音響外，車內重備有多個雜物匣，以方便乘客擺放雜物。
早前，小記曾試駕友人嘅M21.5型號，雖然只係由九龍灣前往荃灣，路程唔係話太長，但行經「先上山，後落斜」嘅龍翔道，駕駛起來可謂舒服得很，車子亦能應付自如；而今回用作測試嘅1.3版本，動力輸出數值雖來得較低，但改配5前速手波後，起步加速表現與1.5公升型號相近，同樣來得敏捷有勁。由灣仔Showroom出發，途經陡斜嘅柴灣道前往拍攝場地，沿途遇上輕微塞車同燈位，不時都要停下來「稍作休息」；但起步時嗰份敏捷嘅反應，實在叫筆者難以忘記，再加上歐式懸掛結構，就算行經一啲迂迴曲折嘅路面，循迹性之高亦予人有十足信心呢！
萬事得M2造型本已極富時代感，加裝全套跑車包圍後，望落更見有一份活力氣息；闊落車廂空間及靈活多變嘅座椅編排，亦會係其過人之處。然而，一台1.3公升引擎輸出平均，但勝在有運轉寧靜及慳油嘅特性。
引擎：1348cc直4DOHC
馬力：91ps/6000rpm
扭力：12.6kgm/3500rpm
傳動：5前速手波
懸掛：（前）麥花臣支柱（後）扭力連桿
制動：（前）透氣碟（後）鼓式（ABS）
輪胎：175/65R14
尺碼：3925×1680×1540mm
軸距：2492mm；車重：1066kg
新車售價：$89,900（標準版）
車輛提供：萬事得汽車（28931112）