溫家寶三日旋風訪港，大家當然都想在總理心中留個好印象。噚朝佢坐船去葵涌睇貨櫃碼頭，煲呔一直坐喺佢右邊，笑而不語；老董就不斷讓位畀行會新貴，等佢哋有機會坐喺總理左邊，兩個保皇黨冇執輸，曾鈺成同田北俊都有機會坐一陣，接近吓權貴。
八方以為民建聯主席應該有啲地位，原來溫總唔係好識佢。曾鈺成同記者講，坐船到半路，董建華特地介紹佢畀溫家寶認識，而溫則表示喺報章見過曾鈺成嘅名，重問佢以前做邊行。阿曾扮謙虛話自己喺中學教書，連校長身份都係老董幫佢講。
據阿曾講，噚日梁錦松坐在國務委員唐家璇身旁，梁愛詩就同中聯辦主任高祀仁坐，最特別嘅係葉劉淑儀，曾鈺成形容：「一上船嘅時候，國務院港澳辦主任廖暉就一手拉住葉劉，叫佢坐喺旁邊，可能有偈同佢傾。」
除咗爭位坐，重有人爭除呔。話說總理只係着機恤去睇貨櫃碼頭，冇打呔；唔知楊永強局長同梁智鴻主席係咪收到風，平日官仔骨骨嘅楊永強同一眾人等都恤衫一件，領鈕都唔扣；點知溫家寶去完葵涌又執番正，打番條呔披番套老西至去威院，搞到班醫生「冇晒莊重」，事後重被人笑擦錯鞋㖭！
傳真︰2623-9278
電郵︰