喺最近一次EuroNCAP撞擊測試中，除雷諾EspaceⅣ獲得最高五星評級外，原來屬SUV類別嘅寶馬X5及富豪XC90，響是次測試中同樣獲得最高五星評級。先講講寶馬X5，當模擬以時速64km/h正面撞向障礙物時，雖然車頭部份看似損毀嚴重，但堅固車架結構卻能徹底保障乘客安全，除車門可正常開啟，以及車內部件（如腳掣等等）並無大幅度向內移而壓向駕駛者外，安全氣袋及安全帶都能發揮最大效用，對乘客保護率達81%；而模擬被時速50km/h汽車攔腰撞及時，設於車內嘅安全簾幕，亦能夠於短時間內彈出，對乘客保護率嘅評分高達100%咁多！
至於富豪XC90，當進行模擬側撞測試時，車內安全氣袋及充氣簾幕組合，不但能保護前排乘客外，就連中、後排乘客亦照顧到，難怪會被有關方面，評定XC90對乘客嘅保護程度高達100%。正面撞擊測試後嘅數據亦顯示，車子本身嘅穩紮車架結構、多個安全氣袋及安全帶組合，都能夠為乘客帶來周全保護，但駕駛者腿部有可能因車內部件向後移壓倒而受傷，不過機會比較細，故此XC90對乘客保護率評分高達88%。