俄羅斯二人女子組合Tatu自從走紅之後，去到邊都係麻煩多多，上個星期去到日本更玩謝咗電視台、fans同警察。前日兩位成員喺銀座行街同唱K，之後又突然喺酒店開記招，重講明對自己早幾日喺直播電視節目罷唱嘅所作所為，完全冇歉疚之心，認真寸到爆！
Tatu前日突然現身東京銀座，Julia同Lena兩位成員就喺鬧市度行街，街上當然人人都認得佢哋，啲fans向兩人大叫Kawaii，結果搞到跟住Tatu行街嘅人愈來愈多，連警方亦要出動。
之後兩位俄羅斯少女就轉移目標，去到銀座一間唱片舖睇碟，又幫fans簽名，然後就去到K場唱K。諗番上星期五佢哋上到朝日電視台嘅直播音樂節目《MusicStation》罷唱，跟住第二日又取消喺ZeppTokyo嘅演唱會，但佢哋兩個喺K場反而唱到又叫又跳，鬼咁開心，擺明想激到電視台嘔血！
唱完K之後，Tatu重未捨得返酒店休息，去咗日皇宮前嘅二重橋行街，當然又再引起另一次騷動，搞到警察又要出動維持秩序。因為嗰日東京嘅天氣都幾熱，Julia終於忍唔住除咗件外衣，只係着白色bra行街，重要係凸點㖭，令到途人同記者都睇到眼定定，連我羅拉睇到都打個突！
入夜後Tatu同佢哋嘅經理人喺入住嘅酒店舉行記招，回應Tatu喺電視罷唱事件，情況就更諷刺。經理人話：「因為個節目同Tatu嘅形象唔配合，電視台又唔同我哋好好溝通，所以Tatu決定唔唱。」而Julia亦好寸咁話：「我哋只係想做自己嘅騷，嗰晚有好多日本明星喺度，搞到我哋唱唔到，我哋唔會向任何人道歉！」
即使Tatu首次訪日出現多多阻滯同問題，但Julia則話：「我覺得今次嘅宣傳好成功，好相信我哋增加咗唔少fans。」佢哋重話今年年尾會再到日本㖭，真係吹佢哋兩位妹妹唔脹！