今日是七．一遊行的大日子，數以十萬計巿民會上街，以實際行動反對二十三條立法，演藝界亦積極響應，黃貫中、杜汶澤和張堅庭不但付諸行動，更自創警世口號反二十三。而林建明更會穿上朋友設計的「防23」T恤參加遊行。
搖滾樂隊Beyond成員黃貫中（Paul）昨日到將軍澳墳場拜祭黃家駒時，表示今日會以市民身份遊行，他昨日更寫下「為了我們的前途！尊嚴！請勇敢一點！七月一號見！」的口號。雖然葉世榮今日要到內地工作，但也透過紙和筆寫下他的心聲「請珍惜一切」。
阿Paul事後說：「係市民都應該支持，可以嘅話呼籲到多一個就得一個，我唔會強迫任何人去。我知道好多人對二十三條唔了解，政府應該畀多啲時間我哋，唔好咁迫做呢一步（立法），今次遊行有機會去講就好講，否則前途會好黯淡，以後嘅日子就會任人魚肉。」記者問阿Paul可擔心有人在遊行時趁機搞事，阿Paul說：「唔擔心，做呢啲事係憑良心嘅！」
導演張堅庭昨日仍在韓國工作，他一直很支持反二十三條大遊行，並於昨晚趕返港。張堅庭亦為大遊行作了一個口號，他昨日在電話中說：「不分左中右，普選我特首。」張堅庭表示已約了張同祖一同往大遊行。
近日國務院總理溫家寶訪港，張堅庭覺得他的到來可帶給巿民希望，他說：「巿民都希望可以直接同佢反映民意，於是特首呢次都幾捉蟲。」張堅庭有見溫家寶短短幾天行程緊密，他十分體諒，張堅庭說：「聽日（即今日）邊個入嚟我間茶餐廳，只要講句『總理保重，請飲奶茶！』，我就免費請佢哋飲奶茶。」
杜汶澤則認為，身為香港巿民，七．一不去遊行會「好嘥」，他昨日接受本報電話訪問時說：「呢啲係巿民嘅權利，唔去用好嘥囉！田北俊（自由黨主席）話『遊行都無補於事』，我都好肯定二十三條會通過，我都幾十歲人，點會唔知？但正如我幫襯餐廳，食咗餐飯好難食，食都食咗落肚，但我有權鬧佢啲嘢難食㗎嘛，有權表態㗎嘛，間餐廳係唔會因為我鬧佢而執笠，但唔等於我咁就唔出聲！」他更自創口號「反對葉劉淑儀電頭髮！反對董建華唔染黑頭髮！反對二十三條！」
林建明今日不但相約大班好友參與遊行，還找人設計了一件「防23」T恤在遊行時穿着，問林建明有甚麼口號時，她說：「我只係以一個小市民身份參與遊行，我會用冷靜、理性同沉默嘅態度去面對。呢幾日我打咗幾十個電話叫朋友參加遊行，好似鍾慧冰、夏淑玲、寶珮如同惠英紅，而佢哋又再分別再打電話畀其他人，所以我哋總數有幾多人都唔知。」
導演張同祖今日亦會上街反二十三條，他說：「我會上街，我會以和平、理性嘅態度去表達，大家上街都有唔同嘅理由，有啲係不滿政府嘅方針，我自己係反二十三條，唔支持二十三條立法。」
導演馬偉豪亦反對二十三條立法，但他不會出席遊行，馬偉豪昨日電話中說：「我唔支持二十三條立法，我贊成上街，但各人有各人嘅表達方式。我聽日（即今日）要開會，我會選擇寫信畀特首辦或者保安局局長表達自己嘅意見。」
採訪：張止寒、戴彩煥、比華利、李珮洳、何永寧
攝影：仇志德、娛樂突發組
