踏入暑假，又到咗球會收購新球員嘅時候，轉會市場喺「七一」亦正式重開，我哋《蘋果波經》今日開始，會有一個全新版面，讀者透過圖像就好容易知道邊間球會斟邊個球員，記得留意喇！
講番今個禮拜轉會市場情況，相信最大單交易非「細哨」朗拿甸奴莫屬；呢位巴西球星已經同曼聯傾得差唔多，淨係睇「紅魔鬼」最初開價九百萬鎊，不斷加碼至一千四百萬鎊，就知費格遜真係志在必得，只不過到時成交價會係幾多啫。
我求大俠都關注澳洲國腳基維爾嘞，英超四大班霸都爭緊佢，有傳利物浦領隊侯利亞暗中出手，如果「紅軍」爭贏，月尾時又多粒星嚟香港，正呀！
皇馬到訪香港行程曝光後，存在好多問題。除咗皇馬開價高外，計劃搵中國國家隊嚟香港亦係另一問題，因為中國甲A聯賽下月九日有比賽，八日畀班國腳嚟香港踢波，會影響各隊備戰，而且甲A因龍之隊對皇馬，亦計劃讓路，再改賽期遷就唔掂，睇嚟順利訪港真係有難度。
巴西前鋒李華度離開AC機會好高，佢嘅落腳地有可能係阿聯酋艾安。雖然艾安方面強調「未正式出手」，但唔代表佢無機會過檔。另有傳聞話艾安有意同巴迪斯圖達簽短期合約，兩個過氣名將會響亞冠盃準決賽對大連實德時雙劍合璧。噱頭就夠，但可信性就……。
范志毅上星期就返咗上海，一直傳出同母會申花簽約，除咗做球員之外，會兼任助教或者領隊，雖然范大將軍話唔會計較人工有幾多，但係到咗今個禮拜都無下文；佢就話唔想再等落去，禮拜二會返英國搵班落。范志毅一年前先當選亞洲足球先生，估唔到𠵱家要浪迹江湖，都幾悲。
前鋒荷利呢個星期四同湖人嘅合約屆滿，恢復自由身，呢位三十三歲老將預言湖人唔會同自己續約咁話。緊係啦，湖人一班老鬼係剛過去嘅球季表現之差有目共睹，好多時輸波都係佢哋累事，湖人來季換血係當前急務，睇怕荷利放定聲氣搵後路都係明智之舉。