「唉，唔使講啦，總理好過特首好多啦！溫家寶總理有才幹，講得出就做得到，但董建華好多事情講咗之後就做唔到，例如八萬五政策咁，重有好多好多……總之係講咗做唔到，人家重以為佢成日車大炮。溫家寶嘅實幹形象好鮮明㗎，佢笑容親切，而且好親民，董特首真係冇得揮呀，期望下一屆出任特首嘅人做得好啲啦！」
周先生--淘大花園居民
「梗係溫總理好過董特首啦！其他地方嘅領袖喺災難性事件發生後，一定第一時間到災區巡視探訪，但董建華完全冇呢回事，即使香港疫區之名解除，佢到淘大只係噏咗少少嘢，根本連樓都唔上，睇吓溫家寶就唔同，第一次嚟淘大，即刻到受害家庭探訪，顯示佢親民、關懷居民，至少喺居民心理上起到一啲鼓舞作用。」
葉興國--淘大花園業主委員會聯會主席
「溫家寶親自上樓探訪淘大花園居民，完全反映到中國領導人要體察香港民情嘅用心，亦顯示出佢親民作風。比較之下，董建華過去幾次都冇上樓就真失敗，再一次證明佢嘅智囊無能，搞公關係一大敗筆。」
盧兆興--香港大學政治與公共行政學系副教授
「溫家寶喺國內都經常探望農民、礦工，今次去淘大貫徹親民作風，亦樹立同以往領導人唔同嘅形象，佢來香港第二日已經深入重災區，董建華兩個月都唔去，兩個人做法係好強烈對比，我相信董建華會幾難堪，應該唔係幾想總理咁親民。」
蔡子強--城市大學社會科學部講師
「溫家寶總理呢次訪港，向特首同港府高官示範乜嘢係領導能力同魄力，董建華過去幾個月連病房都唔敢入，更加唔敢去淘大家訪，係咪怕咗面對群眾？我覺得將董建華同溫家寶比較，太抬舉董建華，兩個人嘅能力、見識，高下立見。」
郭家麒--醫療政策評議會召集人
