夏天都嚟咗兩三個月，沙灘都去咗幾次啦，再講泳衣減價可能會有啲悶，所以今次減價除有本地出品嘅News泳裝外，重搵嚟有大量水上吹氣玩具，淨係浮床都有多款，而且大多數減至半價。游水曬太陽嫌悶嘅，就要買定啲玩具去沙灘搞下新意思喇。
記者：馬慶武
攝影：陳陶鈞
Model：Koppie(KOne)
浮床以極多小六角形組合而成，瞓得舒服之餘，浮床特別嘅地方係就算充滿氣後都可以捲起，方便攜帶，唔使下下去到沙灘先泵氣咁攰咁麻煩。
海豚外形嘅浮床幾得意，不過就算有扶手位都好難「騎」到上去，相信會啱大人玩多啲。
吹氣龍門架、吹氣手套加沙灘波嘅足球套裝，陸上或水中都一樣可以開波。不過如果屋企無私人泳池，相信都好難搵到地方落水玩喇。
細個嗰陣屋企無泳池，一年最多去海灘游一兩次水，所以最希望就係有個咁嘅吹氣小水池可以隨時玩吓水。估唔到𠵱家只係賣百幾蚊咁平，屋企夠位的話一於買個返去幫小朋友實現夢想啦。
直徑差唔多有6呎長，而且浮力勁夠穩陣，成年人瞓上去都唔會左搖右擺，不過小心太舒服喺浮床上面瞓着覺，飄咗出海中心都唔知呀。
無摩打亦唔識行，淨係可以喺水面浮吓浮吓，不過外形就似足一架水上電單車，適合兒童「駕駛」。
只要於減價期內購買任何沙灘用品，即送吹氣飛碟或沙灘波一個，去到沙灘又多樣玩具玩。
搶眼Cutie泳衣
黃色三點式泳衣襯上粉紅波點，搶眼得嚟青春可人。
想成為全場焦點，呢件粉紅三點式泳衣不單止夠晒搶眼，條小裙仔更加cutie可愛。
女仔嘅童裝泳衣款式拍得住成人泳衣，而且花款夠多夠誇張，呢件七彩泳衣就夠晒彩色繽紛，小朋友一定鍾意。
雖然隻色沉咗啲，但係唔使一百蚊就有件三點式，係抵買之選。
兒童泳裝款式都好多，雖然泳褲嘅款式唔算特別，但係真係減到好平。
浮床唔少得
Kelly：「同一大班朋友去沙灘，淨係游水曬太陽會好悶，通常都會帶浮床去玩，不過好易漏氣好易爛，所以年年都會買新嘅，今次睇中個6呎大浮床，真係好似好舒服咁喎。」
最緊要方便
Alice：「啲浮床橡皮艇好似幾抵，可能會買張浮床，就算唔落水都可以瞓喺上面曬太陽，舒舒服服又唔會搞到成身沙。最好梗係可以摺埋嗰款啦，起程游水之前充定氣擺喺車尾箱，去到就唔使吹餐死啦。」
減價日期及時間：即日至7月8日(上午10時至下午7時30分)
減價地點：J&CCompany（長沙灣長沙灣道808號香港紗廠1-2期地下211-216號舖?27441112)