本欄在六月十八日講及ChickenalaKing（港譯白汁雞皇飯），唔知道名稱之由來。一位讀者Paul來函云：「二十年前史雲生有一隻罐頭，內裏係濃烈白汁及雞肉，用嚟撈飯，非常好味，但不知是否售價貴，後來停售，呢隻罐頭好似係叫做ChickenalaKing。」左丁山唔記得有呢隻罐頭，但肯定喺一九八○年以前，市面餐廳已經有白汁雞皇飯，故此阿Paul嘅答案並不成立。
追求呢類答案，唔知算唔算膚淺呢？起碼唔會膚淺得過司徒華上星期四問特首膚淺與naive嘅分別。司徒華乃學問豐富之人，點解會白白嘥咗一個問問題機會，讓特首輕易溜走，而唔問有關23條呢？左丁山有啲唔明白。
據香港大學民意研究計劃發現，支持23條嘅人，多數比較「膚淺」。反對23條立法嘅，佔百分之五十一點九；支持嘅，佔百分之二○點三，而支持者較多係非技術勞動工人和家庭主婦；反對者比較多係年輕、學歷高嘅人，而女性反對者比男性更多。換句話講，一個典型嘅反對派可能係三十歲大學畢業嘅工作女性，典型支持派可能係六十歲基層小學程度勞工，你話呢兩類人之中，邊個知識膚淺啲呢？較早前港大民意調查亦發現支持特首嘅人係較低學歷年紀較高嘅男性，反董者多是年輕、學歷高人士。讀得書多，收入愈高，愈係反董、反二十三條立法，呢個社會現象其實毫不膚淺。