繼《飛龍》後，又一日本勁Game殺入XBOX，今次係CAPCOM王牌系列《恐龍危機3》，首次登陸到最強機種上，聲畫表現絕對冇令人失望，尤其背景由地球移師到太空，科幻味變得勁重，加上大堆變種史前霸者，令機迷感受到喪屍以外嘅恐怖感，更有機迷話日光日白先敢玩喎。
記者、攝影：徐影龍
故事講述三百年前失蹤嘅移民太空船OZMANDAIS突然重現，搜索隊奉命進行調查，入到去人影都冇個，反而失驚無神走嚟大批變種恐龍，隻隻神高神大兼凶殘無比，主角們為求生兼追查，惟有硬住頭皮向前搜索，基本上大橋同電影《異形》有九成相似，不過經常性面對更巨型嘅恐龍，總算有點新鮮刺激感。
既然移師至太空，武器及裝備方面全部HiTech化，唔單止有雷射槍同散彈激光槍，主角更配有噴射飛行器，一躍而起甚至短暫飛行都冇問題，遊戲中段更需掌握邊飛邊射嘅技巧，玩法可謂完全脫離《BioHazard》影子。遊戲一開始已經睇到成艘移民船嘅地圖，範圍之大、分區之多，比CAPCOM歷來同類Game更犀利，恐怕難以三扒兩撥打得爆，玩開日本Game嘅人會嫌太複雜，相反鬼佬機迷就至鍾意，相信歐美市場化亦係今集移師至XBOX嘅主因。
XBOX號稱最強機種，開發人員今回可盡情發揮，將畫面及音效推至高峯。筆者分別以色差及光纖接駁影音器材，畫面方面絕對屬高水準之作，背景複雜豐富，人物及恐龍多邊形紮實，就算用29"WEGA睇都唔覺有狗牙，比GC《BioHazard0》及PS2《DevilMayCry》高幾班。音效方面重正，支援真正5.1輸出，感受到大群恐龍四邊包圍嘅壓迫感，夜晚熄燈玩驚慄效果唔比《零》弱。聲畫質素係XBOX強項之一，筆者相當期待陸續推出日本勁Game嘅XBOX版。遊戲玩法漸漸脫離舊作咁重解謎味道，大部份流程都係以屠龍為主，謎題亦唔算太複雜，若能克服地圖過大問題，相信好啱偏愛動作同射擊類嘅機迷。
遊戲內變種暴龍夠晒惡形惡相，海報更將之發揚光大，兇惡巨龍霸晒成張A1Size海報（報紙攤開之尺寸），相當之有氣勢。香港CAPCOM特別送出五十張《恐龍危機3》大海報畀《蘋果》讀者，想攞就要拎住今日本版，到DreamStore免費換領，數量有限，送完即止。
地址：灣仔東方188商場二樓256號舖
電話：25753285