十四年前，我讀F.1，五月某天早上，A同學打電話叫我下午去遊行，他說約了二十位老師及同學在大丸等，當日陽光普照，我們齊聲大叫到新華社。十四日前，A同學再來電，命令我七月一日要放假，又搵了二十多位同學，地點改在Sogo等，再度上街大喊「反對23條」！明天Dayoff，我以香港市民身份，聯同朋友，一起自製反23Tee去遊行。香港人，維園見！
記者：梁佩芬 攝影：陳盛臣、陳陶鈞、周旭文
逢星期一、三至五出版
點解反23？
杜汶澤一開口就X@Y?Z，粗口一輪，都是大鬧董伯伯，可以出街的說話只是：「人人話董生係好人，咁我阿媽都係好人，唔通叫我阿媽做特首呀？」再來@*%$#@，他大笑：「我真係唔知佢做緊乜，做邊瓣死邊瓣，連電台開咪都要管，香港俾佢玩死！」喺佢爆第三輪粗口之前，我遞件衫畀佢：「不如你將意見表達喺件衫度。」這樣，杜生才平復心情，提筆發洩不忿！
件衫講乜： 「只有董建華扯，先可以救香港！」我懷疑，誰可救港，杜汶澤也茫無頭緒：「我都唔知，總之佢就走吧！」貫徹始終，與他開咪做節目一樣，永遠都是鬧，但又無乜實際建議，算吧！這也是香港人的心聲！
點解反23？
「課堂上，無可避免討論到政府問題，好似每年的施政報告。條文上，完全無界定叛亂顛覆的定義，我們都不知道那時候已觸犯法例，更無可避免有人舉報，難道我批評吓施政就是分裂國家？條文不清晰，急忙立法，完全表露政府蠻不講理的性格。」
件衫講乜： 「有廿三，有口難言」Brenda一語道出。她的遊行衫最大特色是背心設計，「我預計聽日風和日麗，過百萬人上街，一定好焗又熱，點少得背心，行得涼涼哋，心情都無咁煩躁，我哋係用和平手法表達意見。」
點解反23？
「我哋開舖頭，鍾意打牙骱，好多時無意間都話吓政府做緊乜，有時生意唔好，心情煩躁，就會借題發揮，狂鬧政府政策，甚至連中國領導人都照鬧可也，但這是否代表顛覆叛國呢？」做老闆的她，決定明天休業一天去遊行！
件衫講乜： 剪到爛晒，代表如政府真是通過23條，就是整爛香港，將民主自由完全漏出去。
點解反23？
Angel贊成立「國家安全法」，「這是每個國家應有法例。」但她憎恨政府趁火打劫，乘「沙士」剛去、經濟未復甦之際，倉卒在七月九日二、三讀條文，根本就係「亂咁嚟！」她舉例：「以前一啲簡單如職業安全法例，立法會都要用十五個月審議、諮詢，才可通過；為甚麼國家安全法例，以一年半載就速速立法呢？」
件衫講乜： 「董建華膚淺！」Angel一開口就不停鬧：「我覺得董生好老土囉！成日叫我哋讀多啲書，到頭來佢連律師嘅話都唔聽，讀咁多書都係枉然，根本唔理我哋感受，佢至係最膚淺！」
點解反23？
Maggie眼見新聞自由會隨廿三條立法後逐步萎縮，雖然不知畢業後是否真的會做記者，就算小市民，也不希望香港資訊倒退，將人類最基本的權利也被剝削。明天，她已號召二十多位同學一起遊行，大叫：「反對廿三條！」
件衫講乜： 一件色彩繽紛的抗議Tee，「黑色係話畀政府知，我們反對廿三條；但還有很多市民沒空遊行，所以要講畀其他人知，就可以用大量顏色引人注目！」左袖一句「反對23條」，右袖一句「高官要問責」，就是Maggie今次抗議兩大主題。
點解反23？
「香港未有全面普選特首及立法會議員，所以未係時候成立『國家安全條例』。」周穆標反對23條，因為香港已經民主大倒退，絕不可容忍政府進一步壓抑言論自由。「而且，條例喺立法會審議後，還不斷修改，完全漠視立法程序，完全設陷阱予民主派，令人不知不覺犯罪，是一個局多於一個法律！」
件衫講乜： 前面（左圖）：我愛香港，但不要23條。後面（右圖）：一幅圖畫，代表23條不是想維護國家安全，只是設陷阱捉一些反對政府的聲音，根本是對人不對事！
點解反23？
一向對政治漠不關心的林子揚，直至大律師公會大叫「廿三條侵犯公民基本權利」那一刻，才意識到23條的可怕。今天他還可以喺網上及報紙專欄上創作並發放「保安小掃把」、「懵伯！你係得嘅」等諷刺歌曲，但23條成立後，反政府等於反國家，怕且林子揚也要作首「監獄風雲」！
件衫講乜： 鍾情西班牙球會「皇家馬德里」的林子揚，非常高興該會勇奪聯賽冠軍。可惜，他卻不支持本地聯賽，對香港球會「董家理得你」非常憎恨，不外乎是打假波、球員差勁、支出大而無當，近日更高價買入一名全無腳法的23號球員，完全唔理會球會成績，只看一己功利，慘！
點解反23？
葉太一句：「唔通的士司機、酒樓侍應、麥當勞服務員會逐條同我討論？草案都係專家去睇；好似立法會議員、法律界同埋學者。」搞到揸車搵食的康伯眼火爆，「七．一」不上街，對自己唔住！「我嘅職業雖係司機，唔同葉太啲高官咁尊貴，但佢唔好忘記，我都係香港人，𠵱家講到分裂、叛亂國家咁嚴重嘅法例喎，咁就關我事啦！」
件衫講乜： 司機不一定無見識、無學識，康伯用了不足五分鐘，就作了首詩，平仄對稱，詞簡意明，誰說專業人士才懂法律！
「 反抗惡法意鮮明
對錯顛倒不合情
廿萬上街好鬼勁
『衫』褲黑色無得頂」