八方上周寫民政局常秘「眾人媽打」李麗娟返母校瑪利諾派畢業證書畀師妹，佢重講咗啲難忘事畀八方知。
原來李麗娟六四年搞咗份校報，六六年中五時重威水到代表校報訪問嚟香港嘅愛德華甘迺迪。
到咗六七年，當時讀中六嘅李麗娟，本來被任命做學長，但佢覺得任命呢個制度唔好，於是落手落腳搞咗個選舉，由同學自己投票選學長，結果佢又當選番，做咗第一屆由投票選出嚟嘅學長。李麗娟笑言自己搞民主選舉嗰陣得十八歲，叫啲民主派唔好話佢唔支持選舉喎。
而最搞笑嘅一件事就係六七年李麗娟想學做救生員，諗住瑪利諾附近有游泳池，練習都好方便，點知制水，有泳池都冇用。佢重話家中五姊妹，三個家姐都係有牌救生員，得佢咁唔好彩，想學嗰年就制水。
傳真︰2623-9278
電郵︰