有「平民總理」外號嘅溫家寶果然與別不同，喺機場坐完架房車去君悅酒店之後，就同一眾隨員轉坐小巴周圍去，實在冇架子。而佢開口第一句就話，應該早一點、在香港最困難的時候來，呢句話同佢當年陪住趙紫陽去天安門廣場，趙紫陽講嗰句名言「我來晚了」，真係有異曲同工之妙。
港人其實好感謝溫總咁體貼，一上場就嚟香港為我哋消消怨氣，重引述小平先生（唔叫佢做同志）講過，喺英國人統治香港時，百分之九十八嘅港人係中國人，咁回歸後以中國人為主體嘅香港人，應有信心完全可以治理好香港嚟勉勵大家。
鄧小平高瞻遠矚，八方聽聞佢當年講過點解要搞「一國兩制」，就係因為大陸唔識管香港，等港人自己管自己；不過，有一樣要提防嘅，就係唔好令香港變成中國嘅包袱。老鄧真好嘢，咁都俾佢預見到，本來好好的寶地，回歸六年，就要向中央攞着數。
正如唐英年局長話齋，𠵱家森林有好多鹿，特區政府畀埋弓箭同槍啲商界，帶你去捉，捉唔捉到鹿，識唔識脫角就睇你自己本事；至於個森林係阿爺提供，梗係唔好意思講。
而今次嘅幕後功臣之一，係做到變「國寶」、熊貓咁眼嘅俞宗怡，不過，俞小姐死都唔認，重話自己對眼鬼咁靚。
（圖）溫家寶貴為總理，都同一眾隨員坐小巴周圍去，實在夠晒親民。
傳真︰2623-9278
電郵︰