近年，法國標緻車廠致力為旗下車款研製新一代型號，當中除包括已推出嘅307及807車系外，另外重有鬧得熱烘烘嘅107及407車系；而外國方面最近就有消息傳出，話標緻廠方正落力研製一款全新Coupe跑車，除有望成為全新407車系一員外，更極有可能用以取代現有406Coupe㖭！
從預想圖中可以睇到，新款407Coupe造型與406Coupe一樣來得極富流線形，襯以車頭一對低斜頭燈及霧燈組合，望落份外吸引突出之餘，加上四輪大口徑跑車合金胎軨組合，一派跑車形象可謂徹底地展示出來。至於車廂方面，雖然暫時未有關於呢方面嘅詳細資料，但一般相信仍會保留有一份豪邁氣派，當然唔少得有令你坐得舒適貼服嘅跑車座椅，以及齊全車廂設備啦！同時，廠方亦為選擇新車嘅用家提供有多台引擎作選擇，當中包括2.0公升（120匹）、2.2公升（140匹），同埋頂級3.0V6（250匹）型號以切合不同需要。新車有望於2005年舉行嘅日內瓦車展上展出，大家屆時不妨留意吓。