有錢嘅男人鍾意滾，冇錢嘅男人可能重爛滾！城中公子自從生意失敗冇晒錢後，連老婆都因為佢爛滾而同佢離婚，不過公子並冇吸取教訓噃，仍然同班friend日蒲夜蒲。佢班朋友知公子冇錢，但仍然對佢好好，幫佢出埋去蒲嘅費用，搞到公子蒲得重勁過以前。
公子最鍾意同啲friend去中環某間夜店，一落到去就對啲女仔摸手摸腳。以前公子風光嗰陣，當然大把女黐埋去，但𠵱家係人都知佢冇錢，重邊有人肯咁蝕底呀？所以啲女仔一見到佢就即刻彈開，但公子冇因為咁而收手，反而一見到女仔就撲埋去，有懵就博。啲女仔覺得佢討厭之餘，旁人見到都側目。
公子以前雖然都爛滾，不過對女仔幾有風度，唔似𠵱家咁猴擒，唔知係咪因為生意失敗而受咗刺激呢？如果係咁馮仁昭都戥佢悲哀。
孫燕姿近日喺新加坡專心跟陳彼得學唱歌，日前陳彼得間《Themusicclinic》音樂訓練學校喺新加坡開幕，孫燕姿專誠去賀老師，身在新加坡拍劇嘅肥姐沈殿霞亦帶埋愛女欣宜去道賀，唔知肥姐會唔會畀欣宜去學吓唱歌呢？另外，孫燕姿話：「很開心我的老師開設了這個學校，看到有這麼多的學生支持他，我希望以後他的學生滿天下。」
鄭希怡（Yumiko）噚日去荃灣，任「Yumiko舞吧DancingStar」決賽的評判。其間參賽者施展絕技模仿Yumiko嘅舞步，有參賽者着到好性感跳舞，有啲就以騎呢舞步吸引評判，Yumiko坐喺台下忍唔住笑到癲。而Yumiko全家都嚟捧佢場，佢話：「今日爹哋、媽咪、嫲嫲同唱歌老師都有嚟，但爹哋同媽咪星期一就離開香港。」
組合Shine噚日去慈雲山中心出席「Shine半熟男孩簽唱會」，但係就遲咗半個鐘先到場，唱歌時重甩嘴兼走音，事後成員黃又南解釋因為要拍戲所以遲到。徐天佑話拍網劇《男女字典》時有一幕要摸李蘢怡個胸，由於佢過唔到自己嗰關，最後就由服裝指導代摸，但係天佑話絕對唔係因為怕緋聞女友Miki誤會而拒絕摸胸。
樂壇新人張敬軒同趙頌茹噚日喺又一城做電器舖開張嘉賓，嚟自廣州嘅張敬軒每次嚟香港做嘢，都係住酒店，但佢話近日喺銅鑼灣搵咗一間五、六百呎嘅屋，租金大約七、八千，問佢係自己畀定公司環球畀，佢笑笑口話係公司畀住先，不過佢自己都會添置成十萬蚊左右嘅音響器材用嚟作曲。
早前推出嘅《愛情蒲公英》國語情歌專輯，在港大賣，碟內包羅台灣歌手張信哲、張宇同辛曉琪等嘅金曲，呢班歌手將會喺八月一、二號來港，演出「愛情蒲公英演唱會」，門票喺下個月公開發售。由於演出歌手太多，演唱會將會分別以情歸何處、思念、傷逝同心曲弦動作主題。
