噚日凌晨嗰場洲際國家盃季軍戰，都算幾好睇，兩隊不惜氣力快打快鬥攻；結果我哋本報名家青蛙仔推介嘅上盤，喺驚險下總算過關。不過，我求大俠就話最多謝嗰位，都重係哥倫比亞嘅九號仔艾斯迪薩巴。
翻查上陣紀錄，呢位踢巴西高士路嘅前鋒原來今屆五場比賽都係正選，可以話深得教練麥杜拉拿器重。不過身為箭頭，竟然一球都未入過，但係過門而不入，或者中柱中楣卻不計其數；噚朝下半場初段近門又射中柱，實在有負教練厚愛囉。
相信𠵱家大家知點解哥倫比亞參賽前有六場比賽未入過波，其實隊波中後場幾好，尤其係三號嘅耶比斯，風頭蓋過哥度巴；不過班前鋒返去真係要好好苦練射門，唔係守得幾好都冇用啦！
意大利靚仔球星成日同女明星名字連埋一齊，但意國首席門將保方可能見過鬼怕黑（佢曾搭上世界最上鏡小姐芭芭拉，搞到俾未婚妻蒂娜飛咗），佢嘅新女友唔係明星，而係意大利女子二百米跑冠軍卡莉。卡莉不但身材好同樣子甜美，重咁有速度，睇嚟保方今次走唔甩。
費倫天拿曾因財困被貶降意丙聯，重要改名叫費倫迪亞；幸好成功升班同攞返費倫天拿個名。但由於財政仍麻麻，於是搞拍賣籌錢：最搞笑係除咗名將着過嘅波衫或波砵，連更衣室嘅廁紙同球員嘅底褲都有得拍賣，底價只係兩鎊（約二十六港元）咋！
巴西後衞盧斯奧喺轉會意大利嘅羅馬唔成後，就話會留喺德甲隊利華古遜，佢又話同羅馬一直冇確切咁傾過檔嘅事，又話自己喺利隊都好開心，重話曾經推過皇馬嘅邀請！不過，我求大俠就覺得既然利華古遜買咗瑞典後衞路錫，只要價錢啱，盧斯奧被賣走嘅機會重係好大。
國際足協會長白禮達終宣布○六年世界盃決賽周會維持三十二隊，呢個結果令到大洋洲區成為最大輸家，因為仍然要打附加賽爭出線；最大問題係白禮達去年尾曾表決畀個席位大洋洲，所以今次推翻原判，先引起咁多不滿。不過，我求大俠睇完新西蘭喺洲際盃嘅表現，真係唔值得直接出線，就算澳洲都未夠班啦！
阿特蘭大嘅當尼過檔森多利亞後，就好希望來季有好表現，喺國家隊爭正選位；佢個新隊友柳澤敦，都想藉呢次機會爭番日本隊正選。但據我求大俠所知，森隊教練想安排柳澤敦踢左翼，如果係咁，怕且要一段時間適應，發揮機會無當尼咁好！