三星部扭擰王P408的確名副其實，扭扭擰擰都唔肯出場，日前終於都有貨派落場，不過數量就唔係多，亦唔係間間舖頭都有貨，所以成為炒機嘅好時機，初到之日已經由行貨價5千左右炒到上6千幾蚊，不過話咁快十幾部都俾人掃晒，有云「物以罕為貴」，咁炒價自然就高處未算高，早兩日就叫至$7,500，真係好耐都未見過。P408同之前嘅V200差唔多，一樣用CCD影相，效果照樣清晰，只係加咗可以180°旋轉嘅Display，玩自拍就真係非常方便，65,000色彩芒、GPRS、MMS當然有齊，等得嘅就不妨再等吓先郁手都未遲。
文：羅新基
藍芽已經成為大勢所趨，間間廠商都推出藍芽手機或裝置，西門子喺推出S55（S57歐洲版）嘅時候亦都有推出藍芽耳筒，日前終於都有行貨登場，雖然暫時未有西門子機支援藍芽（S55只在歐洲發售），不過用家一樣可以配搭其他廠嘅藍芽手機使用，外形就比其他藍芽耳筒較為大，可能較適合西方人面形，不過掛在耳上就相當穩陣。開價$850，售價唔算貴，想玩藍芽用家亦都可以考慮。
查詢：焦點電訊（23959099）