大使上個禮拜睇到一單好唔開心嘅新聞，覺得既心痛又激氣。話說有一名八歲男童，因為睇電視嘅聲浪太大，俾爸爸鬧咗幾句之後，佢就竟然為咁小事上吊自殺，因而賠上咗自己寶貴嘅性命。
大使真係好感慨，喺早一輪嘅「沙士」疫症之中，醫護人員忙個不停，甚至不幸殉職，佢哋咁辛苦究竟為乜？為嘅亦只不過係想救活每一條人命；另一方面，大使亦認識唔少身患重病嘅病人，治療過程可以話係相當辛苦，但佢哋依然冇放棄，為嘅係乜？無非都係想生存落去。但點解偏偏有人就咁唔愛惜生命，動不動就走去自殺，無論係點，呢啲行為都係唔值得鼓勵嘅。
早幾日，大使就訪問咗一名患有肌肉萎縮症嘅青年，喺佢身上，大使學到好多嘢，亦真真正正睇到乜嘢叫做尊重生命。
呢位年輕人名叫陳家豪，因為受肌肉萎縮症嘅影響，全身除咗把口之外，基本上係完全郁唔到，而且呼吸亦有困難，要二十四小時孭住部呼吸機，但喺咁惡劣嘅情況之下，家豪依然冇放棄自己，重好努力讀書，佢剛剛就考完高級程度會考，等緊放榜。家豪同大使講，如果成績合乎條件，唔理幾辛苦都會繼續升讀大學，佢呢份堅毅精神，真係好值得年輕一代學習。
大使想喺呢度呼籲一吓，如果你哋身邊有一啲勇於面對逆境、擁有積極人生嘅朋友，不妨打個電話畀蘋果日報《暖流》版，大使盡可能將佢哋嘅故事刊登出嚟，同大家分享。
《暖流》版熱線：29908688
暖流熱線
電話2