鄭秀文（Sammi）在新片《戀上你的床》中，除與緋聞男友古天樂有親熱床戲外，更有機會與日本首席AV男優朱古力波合作。Sammi前晚眉飛色舞地憶述與朱古力波演對手戲的情景時，指對方雖肯大方全裸入鏡，但她自己卻全程不敢望他，更極力要求朱古力波用絲襪遮掩重要部位。
由鄭秀文、古天樂與劉青雲主演的新片《戀上你的床》，前晚在香港大球場舉行煞科儀式。Sammi前晚心情極佳，雖然與古天樂的緋聞正傳得鬧哄哄，但前晚看見古仔時仍主動上前打招呼。後來Sammi談起在片中與她演對手戲的日本首席AV男優朱古力波時，更是眉飛色舞，滔滔不絕。
Sammi在片中與朱古力波合演的對手戲，內容講述Sammi在日本遇上朱古力波飾演的壞人後，遭對方脅迫拍AV，幸得古天樂勇救佳人。Sammi前晚開心地大讚朱古力波說：「你哋唔好諗成鹹片呀！我第一次同日本首屈一指嘅男優拍戲，我未睇過佢啲帶㗎！佢好搞笑，佢黐膠紙好有趣。」
談得眉飛色舞的Sammi謂該場戲朱古力波本來答應全裸演出，但她卻堅持要對方遮掩重要部份。Sammi說：「佢好專業，叫佢做抽搐表情都即時做到，完全冇尷尬，佢（重要部位）套住絲襪好得意。本來佢話可以唔使黐膠紙，我梗係要求佢黐啦！有咁實黐咁實㖭呀！唔好畀我睇到呀。我終於體會到三級女星拍戲真係唔好受，平時拍攬攬錫錫嘅戲都好尷尬，我𠵱家體會到啲lovescene嘅深度。」
問Sammi有否看到朱古力波的裸體模樣？她笑說：「唔敢望呀，我隻眼變咗吊眼，全程隻眼向上望，唔敢諗呀！有啲尷尬，都算係大開眼界。」當Sammi得悉朱古力波表示希望有機會再與她合作時，Sammi即說：「等佢轉咗戲種先啦，拍文藝片嘅時候可能先有機會合作。」Sammi透露她曾在書店看過一本有關朱古力波的傳記，問她可覺得對方真的像粒波時，她說：「本書好似叫做一粒朱古力的傳奇咁啦，係咪似粒波我印證唔到，佢（重要部位）成晚都遮住咗呀。」Sammi又說：「我拍呢套愛情喜劇，尺度放寬咗好多，但又唔係好鹹片，不過已經係踏出咗一大步。」
另一方面，Sammi將於後天（下月二日）出席百事舉辦的百事音樂風雲榜「風火英雄會」記者會，屆時朱孝天、吳建豪、郭富城、蔡依林、陳奕迅、那英和陳冠希等人，都會出席，眾人還會乘坐開篷名車到場，踏上升降台欣賞煙花，整個記者會共花費達二百萬元。
此外，梁漢文前晚在澳門出席活動時，無意中踢爆Sammi與許志安在去年聖誕時已分手。而Edmond被問到有關霆鋒遭身邊朋友離棄的傳聞時，他說：「點會，我哋啲大型聚會都見到佢。」阿菲有否參與？Edmond說：「好少，上年聖誕開大型party囉，情侶都一雙一對嚟。好多人覺得阿菲好寸，其實佢好得意，好小朋友，鍾意玩又單純，講嘢好直。」
問到安仔有否帶女伴出席時，Edmond說：「得一個人，得棵葱冇菜呀。」Sammi又帶了甚麼人出席？Edmond說：「佢好少出席呢啲活動，佢冇嚟。」
採訪：陳梅香、王連連
攝影：仇志德
