聽日七一大遊行，小初同女朋友尚未揸定主意去唔去，班經紀老友聽到小初重係猶豫不決，即刻大鬧小初。原來好多經紀老友一早諗住上街遊行，皆因呢幾年一直冇啖好食，唔出街發洩吓唔得喎。
小初明白佢哋點諗，但發洩還發洩，點都要以食飯為先，所以唔該快快趣趣講吓今日有乜嘢好炒。
最近頻頻在工業股中報捷的經紀黃，諗都唔諗就話要留意亞倫國際（684），隻股今日公布業績，股壇長毛亦揸咗5%。
亞倫做開家庭電器同個人護理產品，呢期芬佬鍾意工業股，所以亞倫亦係考慮之列，雖然佢中期業績只升2%，賺3363萬元，但因為有一半市場喺歐洲，下半年業績受惠歐元升值，應有較佳表現。
經紀黃話，其實一早有唔少芬佬留意亞倫，當中包括近期戰績彪炳嘅金手指，另外一家歐資行亦有鳳凰盤買貨，由於呢間歐資行一向胃口大，唔排除會有配售行動跟尾。
慕容小初