恒基嘅大角嘴港灣豪庭，噚日突然有大批狗隻聚集，發展商嚴陣以待，原來係搞狗展，唔少人都帶同愛犬參賽，情況比睇示範單位重墟冚。
現場所見，唔少嬌小玲瓏嘅狗隻，喺狗主悉心打扮之下，惹人憐愛，有啲雖然其貌不揚，但都好討人喜愛，當然唔少得龐然大物型嘅啦。狗主除參賽外，重與同道中人交換養狗心得。影壇大哥鄧光榮都有嚟捧場。
發展商都好照顧啲狗隻，現場特設狗廁所，又提供水畀啲狗降溫，重搵埋狗美容公司同狗糧公司嚟擺檔。
究竟點解發商會搞狗展呢？答案喺現場可以搵到。發展商間唔中透過廣播，提醒在場人士，特別係啲狗主，港灣豪庭係少數可以養寵物嘅屋苑，咁大家就明啦。
蘭西睇番港灣豪庭樓書嘅大廈公契，有一則係咁講「飼養禽畜、雀鳥或其他動物，必須以不對他人造成滋擾為原則」。
差餉物業估價署物業報告顯示，舊年整體寫字樓空置量有1264.8萬方呎，空置率就再升些少達12.6%，後市有乜法子會好呢？若細加分析，重有意想唔到嘅發現。
按各分區嚟睇，空置率最高係南區，有成64%，其次就係屯門嘅54%。以級別嚟分，南區舊年落成嘅甲級寫字樓有49.4萬呎，空置率達86%，估計都係同薄林數碼港有關。
至於沙田區舊年有29.9萬呎乙級寫字樓落成，空置率有81%，即係有24萬幾呎租唔出，就算每呎5蚊，一個月冇成121萬收入咁滯，條數好襟計。
不過，呢兩區嘅空置率都唔算勁，最高係大家諗都諗唔到嘅黃大仙區，舊年有1.18萬呎丙級寫字樓落成，竟然一呎都租唔出，空置率係紀錄性嘅100%。
近排發展商同代理瘋狂咁搞記者會，一日十個八個係等閒事，為咗唔想撞期，喺時間安排方面都避得好辛苦，記者就跑到氣咳。
市場咁多活動本來係好事嚟嘅，但就唔係個個得益，好似負責內地樓盤嘅代理，本來諗住趁非典疫情近尾聲，大舉推盤，但記者淨係本地樓盤都已經做唔切，根本冇人手再去內地採訪，要催谷內地盤就變得困難，想爭取曝光都唔容易。相信呢個情況短期內都唔會有改變，內地樓盤代理睇嚟都要諗吓計先得嘞。
喺非典肆虐期間，商界齊齊用送大禮嚟吸引消費者，好似地鐵就拎一百萬出嚟，畀喺地鐵商場單日消費最高嘅二十二名消費者，參加今日舉行嘅遊戲，勝出嘅十名就可以分到呢一百萬獎金嘞。
呢招究竟有幾吸引，睇吓啲入選者用咗幾多錢就知啦！最多嗰位一日內消費十二萬六千蚊，話港人窮真係冇人信。
𠵱家代理做一手樓，唔單止淨係喺街度搵客，好多時要配合發展商搞活動，或者係度橋幫個盤增加知名度。即將開賣嘅矚目大盤元朗YOHOTown，香港置業除製作一輯宣傳短片外，最近重自製一批YOHO文件套，係由將軍澳新樓組林偉基諗嘅，佢將一個普通嘅文件套用綠色螢光紙包住，外面貼上YOHO字樣，經濟得嚟又搶眼，出外就拎住，可宣傳一番。
另外，利嘉閣就話，幫長實賣到第一百間東涌映濤軒，所以同發展商一齊開香檳慶祝，總之可以宣傳就得嘞。
蘭西
電郵地址：
