冬姑上個禮拜五晚食飯食得好心噏，唔係飯餸唔好食，而係局長大人總算親身體現到香港經濟嘅衰落。話說長春社當晚慶祝三十五周年，請來唔少達官貴人，順便舉行拍賣籌旗。
蔡素玉奉獻咗佢嘅私人珍藏——鑲咗二十三粒鑽石嘅DuPont金筆出來，底價千五。
點知拍賣官嗌到聲嘶力竭，台下先有人叫價，當中包括研究咗支筆好耐結果都係嫌貴冇買嘅九鐵主席田二少，同埋慘遭冬姑威迫還價嘅中央政策組前首席顧問鄭維健。當冬姑叫價叫到五千五嘅時候，兩位男士就再冇同佢爭，冬姑好心痛咁話，十年前拍賣都要呢個價喇。
與冬姑同枱嘅卿姐，拍賣就冇佢份，不過當司儀叫佢講幾句嘢，佢就乘機叫人上街，重學埋特首夫人嘅口脗：「千祈、千祈、千祈，遊行、遊行、遊行。」一個環保組織嘅晚會，當堂變成「煽動叛亂」嘅集會。
（圖）冬姑（中）以五千五投得蔡素玉嘅23鑽金筆，田二少（右）叫到五千就收手。
傳真︰2623-9278
電郵︰