前一排喺幾單私有化事件曝光後，私有化傳聞就好似感冒散播得咁快，傳到周街股份都要進行私有化，股價一升就幾十個巴仙。其中一隻炒私有化嘅香港華人（655），傳聞一出個價已經俾人由6毫子炒到上最高9毫樓上，上星期個市調整，仍然企喺8毫6水平，無點回過，個勢似乎重好硬淨。
今次香港華人傳私有化似乎又係班大戶嘅例牌菜──乾炒牛河。大股東之前已經話過無意將香港華人私有化，不過據知情人士講，其實大股東並非真係無興趣，只係個價唔係好啱。有心人暗示，如果個價跌落去4毫樓下，就不妨考慮考慮。
睇番隻股資產值，其實一啲都唔失禮，喺出售咗銀行業務後，到今日成間公司都重係好似得個殼，現金值每股都有兩蚊，如果要有咁大折讓先肯做私有化，我諗都好難過到小股東呢關。
近月個市好轉，除咗行家同散戶受惠之外，港交所（388）都得益唔少。伏勝有個喺港交所做管理層嘅朋友話，如果今年下半年每日成交額上番80億，港交所年底交成績時，盈利增長起碼會升番幾個百分點，再加埋深得民心嘅「Paul周」回巢，相信對港交所係好事。事關Paul周返咗工無耐，就即刻大刀闊斧咁削減成本，聽講遲啲重會有更多瘦身方案，原因無他，都係應班芬佬嘅要求去增加盈利。
伏勝聽一個大行嘅朋友講，佢哋已經隨時準備好將港交所嘅目標價調高到13蚊，上個禮拜港交所股價重係企喺20日平均線樓上，應該重幾有睇頭，大家不妨等隻股回到11蚊樓下吸番啲貨。
伏勝